Два рыбакі выратаваныя ў Смалявіцкім раёне. Ратавальнікаў выклікаў відавочца, які жыве недалёка ад вадасховішча, ён пачуў галасы і крык аб дапамозе.
На месца аператыўна прыбылі спецыялісты. За 200 метраў ад берага ў палонцы знаходзіліся два мужчыны, яны былі абяссіленыя і ледзь трымаліся на паверхні. Крохкі лёд не дазваляў наблізіцца да пацярпелых - ратавальнікі і спецыялісты АСВОД дзейнічалі хутка і зладжана, па пэўным алгарытме: экіпіроўка, лесвіцы, выратавальная дошка дапамаглі дастаць з вады людзей. З дыягназам "агульнае пераахаладжэнне" мужчыны шпіталізаваныя.
Ратавальнікі нагадваюць: рыбалка і выхад на нетрывалы лёд могуць пазбавіць жыцця. Адносна бяспечным лічыцца ледзяная паверхня таўшчынёй не менш за 7-10 сантыметраў. Да трагедыі могуць прывесці і гульні дзяцей на лёдзе. Адпускаць іх адных на вадаёмы забаронена.
