Дзясяткі тысяч праглядаў збіраюць у інтэрнэце відэаролікі, якія здымае жыхар аграгарадка Копці Віцебскага раёна Уладзіслаў Бяспалы. Зоркі забаўных сюжэтаў - козы. Статак налічвае амаль сотню жывёл. На іх развядзенне ў мінулым гарадскі жыхар адважыўся некалькі гадоў таму. Пасля шматлікіх эксперыментаў спыніўся на альпійскай пародзе і не пашкадаваў.
Марына Раманоўская раскажа падрабязней. Гарэзлівых жывёл на свой падворак Уладзіслаў Бяспалы пусціў тры гады таму. Альпійскія козы не пераборлівыя ў ежы: меню складаецца з сакавітай травы, гародніны, маладога лісця, галінак. Аддача – карыснае малако, з якога атрымліваюцца смачныя сыры. Але зараз усё да кроплі ідзе на выпойванне нованароджаных жывёл.
Козы, расказвае гаспадар, адчуваюць сябе камфортна. А каб не сумавалі, у кампанію - алабай і мальтыйская балонка. Ёсць дзе разгуляцца: 25 сотак на ўскрайку аграгарадка Копці цалкам для жывёл.
Размова з гадаванцамі здаецца забавай. Але сам гаспадар называе гэта індывідуальным падыходам. Вялікая гаспадарка стварае вялікія клопаты. Усіх накарміць, напаіць, прасачыць за здароўем. Але клопаты не палохаюць: у планах - утрая павялічыць пагалоўе.
У статку кожная жывёла мае мянушку. І дарослыя, і нованароджаныя козы - зоркі відэаролікаў. Іх дапытлівасць робіць сюжэты цікавымі і каларытнымі.
Відэастаронка налічвае паўтысячы ролікаў. Тут і забаўныя сюжэты пра нованароджаных казлянят, і карысныя парады тым, хто вядзе гаспадарку. Што будзе ў наступным выпуску, прадбачыць складана. Тэмы блогеру падкідваюць яго гадаванцы. У якасці ганарару - пачастункі ад гаспадара.
Дзясяткі тысяч праглядаў збіраюць у інтэрнэце відэаролікі, якія здымае Уладзіслаў Бяспалы
21 марта 2020
