Аматарам інтэлектуальных захапленняў гэтымі днямі дарога ў Палац спорту. Чэмпіянат Еўропы па шахматах сабраў у беларускай сталіцы каля 400 спартсменаў ад 4 да 77 гадоў. Прамая трансляцыя на ўвесь свет вядзецца праз Інтэрнэт.
У цэнтры мазгавога штурму пабывала Алена Гарэльчык. На гадзінніку 15:30. Шахматысты рассаджваюцца па месцах, вітаюць адзін аднаго, гульня пачалася.
Шахматы - самая дэмакратычная гульня. За адным сталом зусім яшчэ школьнік і дарослы. Мужчыны тут гуляюць супраць жанчын, яшчэ невядома, чыя возьме.
Стаць удзельнікам чэмпіянату Еўропы можа любы шахматыст. Галоўнае, заплаціць уступны ўнёсак. Для гросмайстраў, міжнародных майстроў або майстроў ФІДЭ - гэта 65 еўра, для астатніх даражэй - 130. Але гэта нішто ў параўнанні з прызавым фондам - 100 тысяч еўра. Гавораць, для шахмат - нічога дзіўнага. Пераможца атрымае з гэтай сумы 20 тысяч, уладальнік 20-га месца - тысячу. Але гэтыя лічбы нічога не значаць для тых, хто ў шахматах ужо з паўстагоддзя.
Мінскі чэмпіянат Еўропы атрымаўся адным з самых прадстаўнічых. Па колькасці і рэйтынгу ўдзельнікаў саступае хіба што берлінскаму 7-гадовай даўнасці. Па рэгламенце ўдзельнікі гуляюць 11 тураў па швейцарскай сістэме, сёння быў трэці тур, у нядзелю на турніры выхадны. Першыя 22 шахматысты па выніках чэмпіянату атрымаюць прамыя пуцёўкі на Кубак свету. На хатнім турніры выступае 67 беларусаў, у тым ліку і наш лідар Сяргей Жыгалко.
Падчас гульні тут стаіць цішыня як у бібліятэцы. Размаўляць гучна - гэта маветон. А вось хадзіць павольна паміж радамі ніхто не забараняе, гавораць, так лягчэй думаецца, ды і можна паглядзець гульню сваіх будучых сапернікаў.
За выкананнем правіл уважліва сочаць арбітры. У кожнага пад назіраннем - 10 сталоў. Спецыяльныя людзі, іх у твар удзельнікі не ведаюць, кантралююць, каб ніхто не пранёс у залу, напрыклад, мабільны тэлефон. Сучасныя правілы забараняюць браць з сабою нават ручкі - усё выдадуць арганізатары. Дрэс-код таксама існуе.
Але шахматнае жыццё кіпіць не толькі на цэнтральнай арэне. У Палацы спорту шахматы паўсюль.
Рэпартаж з разборам хадоў і магчымых рашэнняў. Міжнародны гросмайстар Сяргей Шыпаў раскрывае прамудрасці гульні такой простай мовай, што яго разумеюць нават тыя, хто з шахматамі выключна на вы. У суседнім памяшканні на ўвесь свет працуе яго калега з Украіны Яўген Мірашнічэнка.
У кутку ў фае заўважаем яшчэ адну групу за шахматнай дошкай. Увагу хлопцы прыцягваюць адразу, распавядаюць, што прыехалі з Санкт-Пецярбурга.
Для іх барацьба за шахматную карону пачнецца заўтра. Паралельна з дарослым чэмпіянатам Еўропы тут пройдзе, задумайцеся, чэмпіянат свету сярод кадэтаў. Гэта юныя шахматысты - усяго 650 чалавек - да 12 гадоў. І як нам ужо ўдалося пераканацца, шматлікія з тых, хто ледзь скончыў пачатковую школу, могуць даць фору некаторым дарослым.
