Знакавыя раскопкі ў вёсцы Гарадзішча Мінскага раёна. Археолагі знайшлі фрагмент керамічнага гаршка. Высветлілася, што яго ўпрыгожвае асабісты радавы знак князя Ізяслава. Адносіцца ён да канца Х - пачатку ХІ стагоддзяў. Дарэчы, спіс артэфактаў папоўніўся і іншымі прадметамі - падрабязней Алена Вітко.
Гэта адны з апошніх артэфактаў, знойдзеных падчас раскопак у вёсцы Гарадзішча. Спачатку археолагі працавалі недалёка ад ракі Менка - выявілі сляды ювелірнай майстэрні ХІ стагоддзя. Пазней даследавалі вал, але прыйшлося ўзяць паўзу. На адным з участкаў у населеным пункце пачалося будаўніцтва дома. Тэрыторыю праверылі аператыўна - і ёсць сенсацыя! На керамічным фрагменце - фамільны знак з крыжам.
Сапраўдны прарыў у справе адбыўся з лёгкай рукі Евы Арыніч. Гэта яе першыя раскопкі. Так адзінаццацікласніца хацела вызначыцца з будучай прафесіяй. У патэнцыяльным спісе - біяінжынер, псіхолаг і палеантолаг.
Экспедыцыю ў Мінскім раёне кантралююць спецыялісты Інстытута гісторыі Акадэміі навук. Тут жа працуе клуб аматараў археалогіі "Стаўрас". Ён аб'яднаў амаль 40 чалавек. Прыхаджане храма прападобнага Серафіма Сароўскага акрамя раскопак працуюць над іншымі праектамі. Напрыклад, "Вера роднага краю".
Унесці свой гістарычны ўклад можа кожны. Дастаткова запісацца ў клуб ці прыехаць на месца раскопак. Віртуальную ж "экскурсію ў мінулае" можна знайсці ў сацыяльных сетках. Фотахроніка расказвае аб усіх дасягненнях і археалагічных тонкасцях.
Прыбор для пошуку металу і нівелір, рыдлёўкі, шпатэлі і пэндзлі... Каб даследаваць кожны міліметр глебы, археолагі выкарыстоўваюць розныя інструменты. Важна не пашкодзіць таямнічыя знаходкі: а значыць - камбінаваць тэхнікі і не спяшацца.
Школьнікі, студэнты, дарослыя... Даследчыкі тут усіх узростаў. У кожнага свая "археалагічная гісторыя" і матывацыя.
Гістарычную і культурную спадчыну старажытнай сталіцы вывучаюць і зараз. Раскопкі ў вёсцы Гарадзішча прадоўжацца да канца лета. Але таямніц і загадак хопіць не на адзін год.
