Толькі за гэта ім цяпер пагражае да сямі гадоў няволі. Пастаўлялі арматуру, трубы будаўнічым фірмам легальна. А вось сама пастаўка ў Беларусь гэтага метала доўгі час заставалася ў цені. Уладзімір Каралёў паспрабаваў разабрацца ў крымінальнай схеме куплі-продажу.
У дэпартамент фінансавых расследаванняў паступіла аператыўная інфармацыя, што шэраг індывідуальных прадпрымальнікаў са сваіх разліковых рахункаў перыядычна здымае буйныя сумы грошай. Паводле інфармацыі праваахоўнікаў, мужчыны, якія штомесяц пераводзілі ў наяўнасць сотні мільёнаў рублёў, вялі асацыяльны лад жыцця. Аператыўнікі ніяк не маглі зразумець, адкуль штодня ў нецвярозых людзей такія значныя сумы.
Кірыл Данілаў, прэс-сакратар Камітэта дзяржкантролю Беларусі: Дырэктар прыватнай кампаніі сумесна з іншымі асобамі стварыла дзве лжэпрадпрымальніцкія структуры і, выкарыстоўваючы іх разліковыя рахункі і рэквізіты, уцягнула ў гаспадарчы абарот нелегальна набытую металапрадукцыю. Затым гэтая прадукцыя праз рэальную кампанію рэалізоўвалася прадпрыемствамі і арганізацыямі.
Сама схема была досыць простая. Фірма, якая пастаўляла на будоўлі сталіцы і сталічнага рэгіёну арматуру, трубы і іншыя металічныя вырабы, закупляла ў Расіі метал за наяўныя грошы, гэта значыць, у абыход падаткаў. Затым пераафармляла метал на індывідуальных прадпрымальнікаў і яшчэ раз купляла ў іх цалкам афіцыйна. Пасля індывідуальныя прадпрымальнікі, атрымаўшы грошы, пераводзілі іх у наяўнасць і аддавалі 99% ад усёй сумы першапачатковай фірме-гаспадыні.
Аператыўны работнік УДФР КДК Беларусі па Мінскай вобласці і г. Мінску: Гэтыя прадпрымальнікі дзейнічаюць для трэціх асоб. Быў устаноўлены гаспадарчы суб'ект, які ажыццяўляў набыццё металапракату за наяўны разлік для далейшай рэалізацыі.
Зараз фінансавая міліцыя Камітэта дзяржкантролю праводзіць расследаванне па гэтым эпізодзе. Кола падазроных павялічваецца. У дачыненні да жанчыны - кіраўніка фірмы распачата крымінальная справа. Паводле звестак аператыўнікаў, за год ценявы абарот склаў як мінімум 8,5 мільярда рублёў. За ўхіленне ад выплаты падаткаў у асабліва буйным памеры прадпрымальніку пагражае буйны штраф і пазбаўленне волі да 7 гадоў.
