Творчы вечар стаў цудоўным працягам фестывалю японскай культуры ў Мінску. Удзельнікаў і гледачоў канцэрту прывітаў пасол Японіі ў Рэспубліцы Беларусь спадар Сігэхіра Міморы. Мелодыі беларускіх і японскіх кампазітараў прагучалі ў выкананні вучняў музычнай школы мастацтваў № 5.
Наталля Карпава, дырэктар дзіцячай музычнай школы мастацтваў № 5: Свет музыкі шматгранны, ён зразумелы ўсім у любым канцы зямнога шара. Вядома, было вельмі цікава, пазнавальна. Нашы навучэнцы з вялікім натхненнем рыхтаваліся да гэтага выступлення, таму што шматлікія п'есы сёння выконваюцца ўпершыню на канцэрце.
Сапраўдным сюрпрызам стала выступленне інтэрнацыянальнага дуэта флейтыстаў. А песні на японскай мове ў выкананні дзіцячага хору атрымалі самыя гучныя апладысменты.
