Гісторыя Беларусі - скрозь прызму струнных шчыпковых. У Музеі тэатральнай і музычнай культуры прайшла прэзентацыя гітар мінулай эпохі. Больш за сорак інструментаў належаць прыватнаму калекцыянеру, якому атрымалася аднавіць рарытэты.
Падрабязнасці - у Іны Пілевіч. Іграць на рарытэтах дазваляецца. Зараз гэтыя мадэлі струнных шчыпковых не прадаюцца ў магазінах, а ў поры яго юнацтва былі дэфіцытам. Дырыжор Уладзімір Мітраеў палюбіў гітару, калі ўпершыню пачуў творчасць "Бітлз". Захапленне некалі забароненай у Савецкім Саюзе групай магло каштаваць акадэмічнаму музыканту працы. Займаўся прасоўваннем рока і нават удзельнічаў у першым у Беларусі біт-фестывалі.
Уладзімір Мітраеў, калекцыянер: "Фірмовыя гітары першыя з'явіліся ў радыётэхнічным інстытуце ў ансамблі "Алгарытмы", нямецкія. І мы ўсе хадзілі туды як на выставу. Купіць іх было немагчыма. У лепшым выпадку на працягу года афіцыйна ў Беларусь праз нашу базу Белкультуры трапляла 4-5 штук".
Акустычныя, бас-гітары і электраакустыкі. Уладзімір Мітраеў экспануе гітары, якія пастаўляліся ў СССР з сацыялістычных краін. Тут інструменты вытворчасці Балгарыі, Германіі і Чэхаславакіі. Шукаў на аўкцыёнах, гарышчах і ў знаёмых.
Гонар калекцыі - электрагітара Уладзіміра Мулявіна. На гэтым інструменце чэхаславацкай вытворчасці беларускі пясняр іграў у 80-я. Копія вядомага амерыканскага Гібсана пад назвай "Суперстар".
Пятая ў СНД і адзіная ў Беларусі. Гэтую гітару з ласкавым імем "Марына" калекцыянер знайшоў у Пецярбургу. Інструмент быў нямым - адсутнічалі струны. Бо гэтая марка гітары даўно знятая з вытворчасці, дэталі, якія адсутнічаюць, прыходзілася вырабляць на заказ па чарцяжах арыгінала.
Усе экспанаты адрэстаўраваныя ўладальнікам і гатовы прадэманстраваць сваё гучанне. Усяго музыкант валодае больш чым паўсотняй гітар. Але выставіў толькі частку. Неўзабаве прадставіць падборку інструментаў, вырабленых у Расіі, Украіне і Беларусі.
