Апошнія хвіліны самай стыльнай падзеі ў жыцці сталіцы - у рэпартажы Паліны Іванчы.
У сукенцы ад Candy Lady - гэта назва новага беларускага брэнда - любая дзяўчына, прызнаюцца стваральнікі, ператвараецца ў цукерку. З прыгожай абгорткай і смачнай начынкай. Паказам дэбютнай лініі адзення Вольгі Барабаншчыкавай напярэдадні завяршылася самая стыльная падзея ў жыцці сталіцы - Беларускі тыдзень моды.
У калекцыі 36 вобразаў: офісныя касцюмы, кактэйльныя сукенкі і вячэрнія ўборы да падлогі мяккіх пастэльных адценняў. Усю тканіну Вольга Барабаншчыкава прывезла з Мілана, у сезоне вясна-лета - 2015 спявачка і тэлевядучая ўпадабала бавоўну, шоўк, карункі, джэрсі, скуру і купро.
Вольга Барабаншчыкава, спявачка, тэлевядучая: Candy lady - я бачу дзяўчыну жаноцкую, мэтанакіраваную, у якой такі вельмі актыўны лад жыцця, яна сэксуальная, яна далікатная, паветраная, вясёлая.
За гэтыя шэсць дзён Мінск убачыў больш за 40 дызайнерскіх прапаноў для вяснова-летняга сезона - як беларускіх куцюр'е, так і гасцей з Расіі, Італіі, Германіі, Латвіі, Эстоніі, Арабскіх Эміратаў. Гэтую калекцыю прывезлі на беларускі подыум з Тбілісі. У кожнай сучаснай дэталі адзення тут чытаецца старажытная грузінская культура. Прынты музейных экспанатаў харэаграфічнага арту, элементы ўзораў нацыянальнага касцюма. Нават музычны фон - рэмікс грузінскага фальклору ў выкананні ансамбля Самеба.
Цінацін Магалашвілі, дызайнер (Грузія): Я ўжо трэці раз выступаю на Беларускім тыдні моды. І я заўсёды прыязджаю з задавальненнем, калі мяне запрашаюць. Вось, што мне падабаецца ў вашай модзе, у вас вельмі развіта вытворчасць. Калі я захаджу ў вашы магазіны, там напісана: Зроблена ў Беларусі, і я вам зайздрошчу.
Што ж датычыцца модных тэндэнцый, то на гэты конт дызайнеры адмоўчваюцца, а меркаванні гасцей - як заўсёды разыходзяцца:
Манахромныя лукі, скажам, аранжавая сукенка, аранжавыя туфлі - вельмі добра. Вельмі спадабаліся паліто oversize - гэта цікава і падыходзіць жанчынам з любой фігурай.
Карункі ў спалучэнні з мехам, пэўна, і, вядома, шоўк, элегантныя сукенкі да падлогі.
Нацыянальныя матывы, арнаменты.
Камбінезоны і штаны свабоднага крою, вырабы з мяккай скуры, гарошак і пышныя рукавы - гэта прагнозы на лета. А вось што насіць зімой ужо 2016 года - беларускія модніцы даведаюцца ў красавіку. Паводле слоў арганізатараў, у юбілейным, дзясятым, сезоне яны гатовыя зрабіць і паўнацэнныя 7, і нават 12 дзён моднага шоу.
