Лічаныя гадзіны застаюцца да ўрачыстага адкрыцця XXXII Міжнароднага фестывалю мастацтваў "Славянскі базар у Віцебску". Вялікі гала-канцэрт збярэ на сцэне Летняга амфітэатра россып знакамітых артыстаў. Яркае шоу пакажа Белтэлерадыёкампанія.
Насычаная праграма і да афіцыйнага старту. Адкрыццё міжнароднага прэс-цэнтра, жараб'ёўка і дзіцячы конкурс, вернісажы, канцэрты, запальванне новай імянной зоркі. Напярэдадні горад заснуў толькі за поўнач. Адбыліся канцэрты групы "Аўра" і папулярнага расійскага выканаўца Сяргея Лазарава. А першыя хвіліны новага дня ў чашы Амфітэатра быў падняты флаг Міжнароднага фестывалю "Славянскі базар у Віцебску". Самыя цікавыя падрабязнасці - у Вольгі Маслоўскай.
Найбуйнейшы форум мастацтваў у Еўропе, найстарэйшы фестываль на постсавецкай прасторы. "Славянскі базар у Віцебску" піша новы раздзел сваёй гісторыі. Сёння будзе дадзены афіцыйны старт 32-му па ліку міжнароднаму фестывалю.
За некалькі гадзін да гэтага, апоўначы, у Летнім амфітэатры быў падняты флаг "Славянскага базару ў Віцебску". Ператварыць дзейства ў эфектнае відовішча дапамаглі светлавыя гарматы і піратэхніка. Рэжысёрская задумка зразумелая і блізкая кожнаму прыхільніку фестывалю: у Віцебску тысячы сэрцаў б'юцца ў адным рытме, каб праз мастацтва ісці да міру і ўзаемаразумення.
У рытме фестывалю, засынаючы хіба што пад раніцу, Віцебск будзе жыць пяць дзён. Самы рамантычны час для свайго канцэрту выбраў Сяргей Лазараў. Яго шоу пад адкрытым небам пачалося з апошнімі промнямі заходу. Уладальнік шматлікіх прэмій і ўзнагарод, артыст прывёз на фестываль праграму "У самае сэрца". Жывы гук, яркая харэаграфія, моцна энергетыка - гледачы разам з салістам спявалі вядомыя хіты.
Сёння на фестывалі насычаны дзень. Пачне працу міжнародны прэс-цэнтр. Адбудзецца другое конкурснае выступленне юных вакалістаў, а таксама маляўнічая цырымонія адкрыцця імянной зоркі ў чашы Летняга амфітэатра. Сёлета спецыяльнай узнагароды Прэзідэнта Беларусі "Праз мастацтва - да міру і ўзаемаразумення" ўдастоеная заслужаная артыстка Беларусі Алена Спірыдовіч.
Ажыве "Горад майстроў", адбудуцца тэатральныя сустрэчы, вернісажы, канцэрты. А ўвечар на сцэне Летняга амфітэатра вялікі гала-канцэрт з удзелам зорак эстрады.
