Уваходная брама з капліцамі. Старажытная апора праваслаўя набывае архітэктурны стыль. Манастыр у Лаўрышаве будзе агароджаны своеасаблівымі каралямі з 33 капліц. У аснове кожнай - зямля з найбольш вядомых праваслаўных мясцін.
Манах Феадосій, насельнік Свята-Елісееўскага Лаўрышаўскага мужчынскага манастыра: Ужо пачалі звозіць зямлю. Нават спрабуюць са Святой зямлі. Справа ў тым, што там жа забараняюць вывозіць зямлю. Такія малельнькія пакецікі, але ўсё роўна вязуць.
Сучасная тэрыторыя манастыра - 6 гектараў. Будуюць цэнтр рэабілітацыі хворых пасля аперацый. Пакуль рэалізавана толькі трэцяя частка праекта. Неабходны і брацкі корпус - той, дзе жылі манахі, згарэў. Зараз у манастыра ёсць падвор'е ў Лаўрышаве, там жа гасцініца, ёсць домікі для паломнікаў, у вёсцы жывуць і манахі. А іх тут усяго 4 чалавекі. Плюс адзін паслушнік і тры кандыдаты.
Дзмітрый Жуеўскі, насельнік Свята-Елісееўскага Лаўрышаўскага мужчынскага манастыра, кандыдат у паслушнікі: Тут ёсць незразумелая Боская ласка. Гэтае месца прываблівае. Не толькі мяне. Я заўважаю, што сюды хочацца прыязджаць.
Манастыр быў заснаваны яшчэ ў 13 стагоддзі. Доўгі час невядомым заставалася месца, адкуль ён пачаўся. Дапамаглі археолагі. Яны адкапалі падмурак старажытнага духоўнага цэнтра. Сёння гэта вёска Лаўрышава за некалькі кіламетраў ад сучаснага манастыра.
Лаўрышава, магчыма, і ёсць цэнтр Вялікага Княства Літоўскага. Вялікі князь Войшалк, калі стаў манахам, не пераставаў быць кіраўніком дзяржавы, і зрабіў манастыр яе цэнтрам. Адна з галоўных тайн нацыянальнай гісторыі, магчыма, перастане быць тайнай. Сенсацыйнае меркаванне гісторыкаў, якое яшчэ чакае доўгі працэс доказаў - Войшалк і ёсць святы Елісей, 500-годдзе кананізацыі якога адзначаецца сёлета.
Лаўрышава - ад слова лаўра. Раней так называлі вялікі мураваны мужчынскі манастыр. Ён стаяў на гары, з трох бакоў абмываўся водамі Нёмана. Падчас Першай сусветнай толькі тут кайзераўскім войскам удалося перайсці раку.
Зараз праз Нёман пабудавалі мост, што дазваляе напрамую за некалькі хвілін манахам дабрацца да вёскі. А раней трэба было ў аб'езд пераадолець 25 кіламетраў.
