Сёння не стала народнага артыста Беларусі, лаўрэата Дзяржпрэміі, кампазітара Дзмітрыя Смольскага. Яму было 80 гадоў. Юбілей ён адзначыў усяго некалькі месяцаў таму. Урачыстасці былі перанесены на кастрычнік. У Вялікай зале Белдзяржфілармоніі быў намечаны канцэрт з вядомымі і новымі творамі майстра. Але жыццё павярнулася інакш. Сэрца кампазітара спынілася. Пра легенду - Алена Борматава.
"Настальгія" - новы твор Дзмітрыя Смольскага. Прэм'ера была запланавана на кастрычнік. Зараз сімфанічны аркестр выканае яго ўжо ў памяць аб аўтары. Усяго некалькі месяцаў таму кампазітар адзначыў 80-годдзе. А яшчэ ў 1940-м трохгадоваму дзіцяці паставілі дыягназ "парок сэрца". Урачы не гарантавалі доўгага жыцця. З дзяцінства Дзмітрый - сын вядомага музыкаведа - стаў займацца музыкай. Першыя кампазітарскія навыкі атрымаў у Цікоцкага. Паступіў у Маскоўскую кансерваторыю, але з-за хваробы вымушаны быў адкласці вучобу. Вярнуўся ў Мінск і стаў студэнтам беларускай кансерваторыі. Вучыўся ў класіка Багатырова. Затым сам больш чым 50 гадоў жыцця аддаў сённяшняй Акадэміі музыкі - спачатку простым выкладчыкам, а затым і прафесарам.
Дзмітрый Смольскі - аўтар 15-ці сімфоній. Менавіта ён прымусіў свет захапляцца беларускай акадэмічнай музыкай. Яго Дзявятая і Трынаццатая сімфоніі напісаныя для аркестра і электрагітары. Ніхто ў свеце да Смольскага не ствараў падобнае. А сын Віктар Смольскі - удзельнік легендарнага заходнегерманскага гурта RAGE - Паганіні электрагітары, як яго называюць у свеце, творы бацькі выконвае на шматтысячных адкрытых пляцоўках. Затым сімфоніі Смольскага падхопліваюць рок-выканаўцы па ўсім свеце. Беларуская музыка гучыць у ЗША, Германіі, Італіі, Францыі, Паўднёвай Карэі. А CD з запісамі яго сімфоній, выпушчаны брытанскай фірмай "Алімпія", быў прызнаны лепшым на конкурсе кампакт-дыскаў у ЗША.
Смольскі - аўтар манументальнай араторыі "Мая радзіма" на вершы беларускіх кампазітараў. Ён пісаў і інструментальныя канцэрты, вакальныя сачыненні. Лаўрэат Дзяржпрэміі за нацыянальную оперу "Сівая легенда" паводле Караткевіча. Сам жа рабіў і аўтарскую рэдакцыю. Менавіта яна зараз у афішы беларускага Вялікага.
Развітанне з кампазітарам пройдзе ў панядзелак, 2 кастрычніка, у Вялікай зале Белдзяржфілармоніі.