У класны журнал зазірнула Іна Пілевіч.
Да дзіцячага Еўрабачання застаецца месяц. Але гэты факт не гарантуе даведкі аб вызваленні ад заняткаў у школе. У Надзеі Місяковай будуць выпускныя экзамены пасля заканчэння 9 класа, таму ўрокі яна не прагульвае, а рэпетыцыі плануе толькі пасля іх. У журнале насупраць яе прозвішча дзявяткі, асабліва добра даюцца мовы і літаратура. Хаця ў роднай 20-й сталічнай гімназіі Надзя больш вядомая не як добрая вучаніца, а як паспяховая маладая артыстка. Без яе выступленняў не праходзіць ні адно школьнае свята.
Са школы агульнаадукацыйнай у музычную. Віртуознасці ігры на фартэпіяна няма мяжы. І ў гэты ўжо няпросты графік Надзі ўпісаная падрыхтоўка да Еўрабачання - сустрэчы з журналістамі, фотасесіі, візіты да ўрача-фаніятра і, вядома ж, рэпетыцыі.
Надзея Місякова, прадстаўніца Беларусі на дзіцячым Еўрабачанні-2014: Я некалькі разоў на тыдзень займаюся вакалам, харэаграфіяй. Таксама зараз удзельнічаю ў розных канцэртах. І гэта таксама дапамагае ўжыцца ў нумар, у вобраз, у песню.
Новая аранжыроўка патрабуе новага танца. Конкурсная песня стала яшчэ больш дынамічнай за кошт увядзення некалькіх інструментаў. Харэограф Вольга Шармава ў першую чаргу ўлічвае тэлевізійныя асаблівасці конкурсу, каб беларускі нумар арыгінальна глядзеўся ў эфіры.
Дыскі, схаваныя ў амулеце, лавец сноў, трохкаляровыя фенечкі з лёну і галаўныя ўборы, упрыгожаныя пёрамі. Усё гэта разам з буклетам знойдуць прыхільнікі Надзеі ў яе промапакеце. Сувенірны набор выкананы ў этнічным стылі і гульнявой манеры, каб у першую чаргу прыцягнуць увагу дзіцячай аўдыторыі.
Промапрадукцыю Надзеі Місяковай упрыгожвае беларускі арнамент. Праўда, традыцыйны ўзор крыху змяніўся. Напрыклад, голуба замяніў сокал - птушка, якой і прысвечаная конкурсная песня.
Сцэнічныя касцюмы адпраўленыя на дапрацоўку. Дызайнер дадасць некалькі яркіх элементаў. 15 лістапада на мальтыйскай сцэне Надзея паўстане і ў новым галаўным уборы. Аўтэнтычны вобраз дапоўніць ільняная павязка, упрыгожаная драўлянымі пацеркамі і пёрамі. Але не сакалінымі, лепш глядзяцца пёры фазана.
