На "Славянскім базары ў Віцебску" - сёння 5-ы дзень фэсту - моладзевы - самы масавы. У праграме форуму мастацтваў ён з'явіўся ў 2003 годзе і зараз штораз збірае ў горадзе на Дзвіне самых таленавітых, крэатыўных і спартыўных маладых людзей з розных рэгіёнаў Беларусі. Яны ўдзельнічаюць у танцавальных флэшмобах, бітве дыджэяў, вялікім арт-парадзе. Кульмінацыяй дня стане выступленне маладых вакалістаў - удзельнікаў міжнароднага конкурсу "Віцебск-2017". Канцэрт пачнецца ўжо менш чым праз гадзіну на сцэне Летняга амфітэатра. Гэта першы конкурсны дзень фіналу. Вакалісты выканаюць славянскія хіты. Выніковы топ-15 стаў вядомы напярэдадні. Сярод лепшых і наш Ягор Шаранкоў. Сёння ён выйдзе на сцэну трэцім. Усе падрабязнасці аб фэставых падзеях - у Вольгі Маслоўскай.
Калі скласці рэйтынг самых масавых фэставых падзей, то Дзень моладзі будзе ў першых радках. На "Базар" сябе паказаць прыязджаюць маладыя і крэатыўныя з усіх абласцей краіны. Абавязкова бяруць з сабою сяброў. "Міс Чароўнасць" Гродзенскага медыцынскага Іфуная Дымаку з сяброўкамі і ў Віцебску ў цэнтры ўвагі. Фатаграфіі з хэштэгам "прыгажуні з Нігерыі на Дні моладзі" ўжо ў Сетцы.
Галоўных герояў Дня моладзі сустракалі апладысментамі. Патрыёты ўсклалі кветкі да Вечнага агню і да позняга вечара не сыходзілі з плошчы Перамогі. Тут знайшлося месца фэсту субкультур, чэмпіянату па скейтбордзе, танцавальнаму марафону, моладзевым падворкам і святу беларускіх народных гульняў.
А вось моладзевы парламентарызм - тое, што ў Беларусі ўжо працуе. Падчас "Адкрытага дыялогу" маладыя парламентарыі з усіх рэгіёнаў распавялі пра самыя яркія праекты, рэалізаваныя дзякуючы іх ініцыятыве.
Яшчэ адна знакавая сустрэча - пасяджэнне савета дырэктараў Сусветнай асацыяцыі фэстаў. З 2015 года штаб-кватэра гэтай аўтарытэтнай арганізацыі знаходзіцца ў Віцебску. У вялікую творчую сям'ю сёння афіцыйна ўвайшлі культурныя праекты з фінскага Турку і Масквы.
Тым часам на віцебскім фэсце закручваецца інтрыга. На вакальным спаборніцтве маладых выканаўцаў сёння - першы конкурсны дзень. Акампануе Нацыянальны акадэмічны канцэртны аркестр Беларусі пад кіраваннем маэстра Фінберга. Выбар песні абмежаваны ўмовай: гэта павінен быць славянскі хіт. Выступленне на галоўнай фэставай пляцоўцы - вялікі гонар і сур'ёзнае выпрабаванне для канкурсантаў. Зберагчы звязкі, калі на канцэртнай пляцоўцы ўсяго плюс 15, - задача няпростая.
Пазбавіцца ад дрыготкі ў голасе і пачаткоўцам, і ўжо дасведчаным артыстам дапамагаюць тут. Падчас фэсту ў Летнім амфітэатры працуе кабінет фаніятра.
На рэпетыцыі - курткі і цёплая гарбата. А ўвечары канкурсанты разлічваюць на цёплы прыём гледача.
Ужо менш чым праз гадзіну гэтая сцэна з рэпетыцыйнай ператворыцца ў конкурсную. Прагоны ідуць увесь дзень. Выступленне адказнае і складанае. І не толькі таму, што спяваць маладыя вакалісты будуць у суправаджэнні аркестра - каманда Белтэлерадыёкампаніі забяспечыць прамую трансляцыю канцэрта.
Беларускі вакаліст Ягор Шаранкоў выйдзе на сцэну пад нумарам 3. Напярэдадні ён увайшоў у 15 лепшых галасоў конкурсу. У яго выкананні прагучыць балада "Крыжы" на вершы Янкі Купалы.
Сёння ў 10 вечара тэлеканалы "Беларусь 1" і "Беларусь 24" пачнуць прамую трансляцыю з віцебскага амфітэатра конкурсу выканаўцаў эстраднай песні "Віцебск-2017". Пажадаем нашаму Ягору Шаранкову ўдачы!
