Музыка аўстралійскіх абарыгенаў у гомельскім парку

4 Чэрвеня 2014
Яго вынайшлі ў Аўстраліі. Ён лічыцца самым старажытным музычным інструментам на зямлі. Сапраўдны дыджэрыду з нядаўніх часоў можна ўбачыць і пачуць у гомельскім парку. Музыку аўстралійскіх абарыгенаў асвоіў 19-гадовы юнак.

Вольга Халадовіч узяла майстар-клас па ігры.

На гэтым інструменце амаль немагчыма паўтарыць адну мелодыю двойчы. Яна - з самага сэрца Аўстраліі. Дыджэрыду, або, як яго звалі мясцовыя абарыгены, - едакі, лічыцца адным з найстаражытнейшых музычных інструментаў на зямлі.

Улад Старынскі пачуў дыджэрыду два гады таму ў Маскве. І быў настолькі зачараваны незвычайным інструментам, што не толькі навучыўся на ім іграць, але зараз ужо і сам вучыць іншых.

Сапраўдны - аўстралійскі - з эўкаліпта дыдж ёсць пакуль толькі ва Улада. Аднадумцам ён дапамог вырабіць аналагі музычнага інструмента з самай звычайнай пластыкавай трубы. Дарэчы, навучанне ігры на дыджэрыду - выдатная альтэрнатыва фітнесу, дапамагае навучыцца кантраляваць усе мышцы цела.

Аўстралійскія абарыгены так прывіталі адзін аднаго на далёкіх адлегласцях. А яшчэ гэты інструмент выкарыстоўвалі шаманы. Ігра на дыджэрыду суправаджае рытуалы і спрыяе ўваходжанню ў транс.

Ва Улада ўжо 11 вучняў. Некалькі гадзін на тыдзень яны старанна вучацца правільна дыхаць і іграць на самым старажытным інструменце на зямлі. І далучыцца да іх можа любы ахвотнік.