Школьнікі і студэнты з Беларусі, Кітая, Карэі, а таксама Расіі спаборнічаюць у прэзентацыях сваёй краіны, выкананні нацыянальных песень і танцаў і прыгатаванні аўтэнтычных страў. Надзея Сербіненка пазнаёмілася з удзельнікамі.
Пазнаёміцца з культурай адразу пяці краін свету можна сёння у гімназіі №12. Беларусь, Расію, Кітай, Вялікабрытанію і Карэю прадстаўляюць школьнікі і студэнты праз мастацтва: музыку, танец і літаратуру.
Янь Мэн прыехала у Беларусь з Кітая некалькі гадоў таму. Зараз дзяўчына вывучае беларускае мастацтва ва ўніверсітэце культуры. Для прадстаўлення сваёй краіны на міжнародным фестывалі Янь Мэн абрала сыху - старажытны струнна-смычковы музычны інструмент.
Янь Мэн, удзельніца фестывалю "Дыялог культур" (Кітай): "На маёй радзіме - у правінцыі Унутраная Манголія - гэты інструмент вельмі папулярны. На ім іграюць ужо больш за 700 гадоў, але да гэтага часу ён не губляе сваёй актуальнасці. Мне вельмі прыемна прадстаўляць багатую культуру Кітая тут, у Мінску".
Фестываль "Дыялог культур" праходзіць у 12-й гімназіі Мінска сёмы раз. Кожны год установа адукацыі становіцца міжкультурным цэнтрам для школьнікаў і студэнтаў розных краін - у тым ліку Турцыі, Італіі, Швецыі, Польшчы. Сёлета ганаровым госцем стала каманда Карэі.
Расію на фестывалі прадстаўляюць адразу дзве каманды. Адна - з маскоўскай школы №1018. Школьнікі зрабілі стаўку на гастранамічны конкурс і прывезлі свае традыцыйныя прысмакі - абаранкі, бліны і піражкі. А госці з Далёкага Усходу - з Якутска - прадстаўляюць свой народ праз музыку.
Заўтра фестываль культур свету працягнецца, але ў другім фармаце. У Палацы дзяцей і моладзі пройдзе пятая міжнародная канферэнцыя "Гімназічная мадэль ААН". Пляцоўка збярэ 300 юных дыпламатаў з розных краін свету.