Замалёўкі карцін сельскага жыцця, Палессе, Купалле, вялікае свята ў гонар уборкі ўраджаю, якое аб'ядноўвае не толькі вяскоўцаў, але і жыхароў мегаполіса. Сёння беларуская мастачка з сусветным імем Жанна Капуснікава прэзентуе публіцы свой новы аўтарскі праект. Стыль карцін аўтар мянуе як народны арт і працуе даволі каларытна. З вернісажа наш карэспандэнт Дар'я Тарасава.
Нараўне з новымі працамі экспазыцыя ўключае 18 карцін з ужо нашумелага праекта "Дажынкі" 2013 года і складае 30 вялікіх палотнаў. Выстава прымеркаваная да юбілею мастачкі.
Жанна Капуснікава - вядомая беларуская мастачка. Яе працы знаходзяцца ў прыватных калекцыях па ўсім свеце. Дызайнер па касцюмах, мастак-дэкаратар і мастак-пастаноўшчык, першая сур'ёзная праца - гэта супрацоўніцтва з ансамблем "Песняры". Паводле яе слоў, Уладзімір Мулявін заўсёды давяраў маладым спецыялістам. У 2003 годзе Капуснікава нават удастоілася прыза за лепшы дызайнерскі касцюм на міжнародным кінафэсце ў Х'юстане. Жанна - мастак, які не баіцца эксперыментаваць з колерам. Ружовы, жоўты, зялёны і чырвоны… Яркія плямы лакальнага колеру - прыкмета жывапісу Капуснікавай. Некаторыя адносяць творчасць аўтара да такога кірунку, як поп-арт. А вось мастачка глядзіць на свае працы, хутчэй, як на тэатр Буф, а такі кірунак у жывапісе заве "жыццёвым рэалізмам звычайным".
Так, у народнай творчасці прысутнічае тэма дажынкаў і збору ўраджаю, такі лейтматыў не пакінуў авангардыстку абыякавай. У мастацкім праекце на вялікіх палотнах намаляваныя сцэны з сельскага жыцця. Майстэрню Жанна пазначыла як уласны кавалак поля, а вось выстава атрымалася сапраўднымі персанальнымі "Дажынкамі". І, дарэчы, тут пераважаюць не толькі яркія і светлыя тоны.
Да традыцыйнай, але, як апынулася, незвычайнай тэмы народнай творчасці аўтар яшчэ плануе вярнуцца. Паспрабаваць разбурыць стандарты свайго ўспрымання і бліжэй пазнаёміцца з творчасцю неардынарнай Жанны Капуснікавай можна ў Цэнтры сучасных мастацтваў.
