На Мальце напярэдадні эмацыйна і ярка адгрымела "Еўрабачанне". Прамую трансляцыю гледачы маглі назіраць на тэлеканалах "Беларусь 1" і "Беларусь 24". Але, праўда, ад іх нічога не залежала: у галасаванні прымалі ўдзел толькі журы, такія правілы гэтага года. У выніку перамогу атрымала грузінка Марыям Мамадашвілі. Наш прадстаўнік Аляксандр Мінёнак на 7-й пазіцыі. Беларускага артыста актыўна падтрымлівалі на радзіме, паклоннікі нават арганізавалі некалькі вечарынак. Разам з імі за трансляцыяй сачыла Іна Пілевіч.
На цэлы вечар гэты клуб зачынены на спецабслугоўванне. Тут праходзіць дзіцячая вечарынка. Юныя фанаты "Еўрабачання" сабраліся, каб падтрымаць нашага дэлегата на міжнародным конкурсе - Аляксандра Мінёнка. За трансляцыяй шоу сочаць аднакласнікі, сябры і тата маладога артыста. Два гады таму сям'я Мінёнак пераехала з Віцебска ў Мінск дзеля кар'еры хлопчыка. У той жа час не менш горача за Сашу перажываюць на другім канцы сталіцы.
У гэтым цэнтры мастацтва артыст-пачатковец браў урокі харэаграфіі. У момант аб'яўлення 9-га нумара многія не могуць стрымаць эмоцый.
На мальтыйскай сцэне – беларус з кампазіцыяй "Музыка тваіх перамог". Аляксандр Мінёнак запальвае публіку нават праз экран. Не проста спявае ўжывую, але пры гэтым танцуе і катаецца на гіраскутары.
Галасаванне гэтага года - без тэлегледачоў. Пераможцу шоу вызначаюць тры склады журы: нацыянальныя дзіцячае і дарослае, а таксама прафесійнае. Змяненні правілаў толькі падаграюць хваляванне. Дзве з паловай гадзіны музычнай інтрыгі. Трыумфатарам дзіцячага "Еўрабачання-2016" стала Марыям Мамадашвілі з Грузіі.
Паменшаная копія Эдзіт Піяф, дыснэеўская прынцэса, менавіта так яе ахрысцілі журналісты. Падчас выканання на біс сваёй песні "Мзэа", што ў перакладзе "сонца", маленькая пераможца ад хвалявання забыла словы.
Марыям Мамадашвілі – пераможца міжнароднага дзіцячага конкурсу песні "Еўрабачанне-2016": "Мая самая вялікая мара здзейснілася. Я стаю тут, на гэтай сцэне, і не магу паверыць. Эмоцыі перапаўняюць, як і падчас выступлення. Я вельмі старалася расказаць пра тое, што мы ўсе вельмі блізкія – у нас адно агульнае сонца".
Па выніках галасавання беларус набраў 177 балаў і аказаўся на 7-й пазіцыі з 17 магчымых. Найвышэйшую адзнаку нашаму прадстаўніку паставілі нацыянальныя журы Расіі і Ізраіля.
Ушанаванне трыумфатара прайшло на лірычнай ноце. Дзеці плакалі, стоячы пад вадаспадам з канфеці. Абдымаліся і зноў плакалі, упершыню даўшы волю пачуццям, не паводле сцэнарыя.
Ужо заўтра фанаты збіраюцца сустракаць свайго куміра з Мальты. Аляксандр Мінёнак разам з камандай прыляціць у Нацыянальны аэрапорт Мінск у 21:15.
