Пасля некалькіх этапаў кастынгу шоу-прадзюсарам былі прапанаваныя тры кандыдатуры, якія цалкам супалі з нашым меркаваннем і былі з задавальненнем зацверджаныя. Такім чынам, на асноўнай сцэне конкурсу будуць працаваць адразу трое вядучых. І ўсе яны добра знаёмыя беларускай публіцы. Наш вядучы навін, шоумен, каментатар "Еўрабачання" з 2013 года, чалавек, у праграму да якога ўжо выстройваецца чарга, - Яўген Перлін. Прадстаўніца нашай краіны на дзіцячым "Еўрабачанні" мінулага года ў Грузіі Хелена Мерааі і шматразовая фіналістка нацыянальных адбораў на песенны форум, удзельніца самых розных тэлешоу, спявачка Зінаіда Купрыяновіч - або зараз ужо Зена.
І ўсё ж першымі "Добры вечар, Еўропа!" і "Прывітанне, Аўстралія!" тэлегледачам скажа яшчэ адна пара вядучых Белтэлерадыёкампаніі. Дзяніс Дудзінскі і Ганна Квілорыя. Яны правядуць цырымонію адкрыцця еўратыдня 19 лістапада ў "БелЭкспа". Гэтая добрая традыцыя штогод папярэджвае вакальны конкурс - мы абавязкова пакажам, як гэта будзе.
Больш як 2 тысячы білетаў на шоу атрымаюць юныя гледачы з усіх абласцей краіны. Запрашальныя таксама ўручаць дзецям з абмежаванымі магчымасцямі і адораным вучням. Пакуль яшчэ можна набыць месцы ў зале і ўбачыць конкурс ужывую. Абсалютна "люстраны" канцэрт у рэжыме прамога эфіру адбудзецца напярэдадні фіналу - 24 лістапада. Білеты на генеральны прагон можна купіць як у касах сталіцы, так і анлайн на сайтах BуСard і Белтэлерадыёкампаніі tvr.by у раздзеле "Дзіцячае "Еўрабачанне".