Дзень тэатра сёння адзначаюць ва ўсім свеце. Вось ужо больш як чвэрць стагоддзя сваё прафесійнае свята беларускія дзеячы мастацтва адзначаюць цырымоніяй уручэння прэмій "Хрустальная Паўлінка".
У розныя гады ўладальнікамі ўзнагароды Саюза тэатральных дзеячаў былі Стафанія Станюта і Генадзь Гарбук, Валерый Раеўскі і Тамара Ніжнікава, Барыс Луцэнка і Наталля Гайда. У гісторыі прэміі былі і ўнікальныя выпадкі, калі статуэтка і званне лаўрэата даставаліся адначасова двум дзеячам. Сёлета галоўны прыз быў уручаны актрысе Нацыянальнага акадэмічнага тэатра імя Янкі Купалы, народнай артыстцы Беларусі Зінаідзе Зубковай.
Адначасова з уручэннем "Хрустальнай Паўлінкі" журы вызначае і ўладальнікаў прэмій "Хрустальная кветка", "Хрустальны анёлачак" і "Хрустальная зорка".