Высокае месца ў рэйтынгу

1 Лістапада 2015

На тыдні экспертная супольнасць абмяркоўвала новыя дадзеныя рэйтынгу Сусветнага банка Doing Business. І абмеркаваць сапраўды ёсць што. Беларусь заняла 44 месца з дзвюх сотняў краін. Прычым фінансавая арганізацыя дадае Беларусі адразу 13 пазіцый, ацэньваючы паляпшэнне дзелавога клімату ў краіне.

За апошнія 7 гадоў, насуперак скепсісу шматлікіх назіральнікаў, мы ўшчыльную наблізіліся да трыццаткі лепшых. Нагадаем, трапіць у ТОП-30 на працягу найбліжэйшых гадоў, такую задачу ставіў перад урадам і парламентам Прэзідэнт.

Пакуль жа 44 месца - гэта суседства з Бельгіяй і Італіяй, дзе дзелавы клімат па еўрапейскіх мерках узорны. Адносна партнёраў па ЕАЭС мы саступаем менш як 10 пазіцый Арменіі і 3 пазіцыі Казахстану, і ў сваю чаргу апярэджваем Расію і Кыргызстан. Суседняя Украіна толькі 83-я.

Такім чынам, якія ж пазіцыі атрымалася палепшыць, і на што звярнулі ўвагу эксперты Сусветнага банка. Складаецца ТОП бізнес-краін па дзесяці параметрах. На графіцы відаць, што адной нагой мы ўжо ў трыццатцы. Па рэгістрацыі ўласнасці сёмыя. Па рэгістрацыі прадпрыемстваў - 12-я, у трыццатку ўвайшлі па выкананні кантрактаў. І немалаважная тэма для прадпрымальнікаў - адсутнасць бар'ераў у знешнім гандлі. Тут мы за год палепшылі паказчыкі ў 6 разоў і сталі 25! Ледзь менш бюракратыі ў будаўніцтве, і тут мы былі б у трыццатцы.

Раман Осіпаў, дырэктар інвестыцыйнай кампаніі: "Пастаўленая задача ўвайсці ў 30-ку. І мы ўжо даволі блізка. Гэты рэйтынг, які мы маем зараз, гэта вялікая праца, якая была праведзеная па ўсіх сферах рэгулявання дзейнасці бізнесу ў Беларусі за апошнія 5 гадоў".

Віктар Маргелаў, старшыня Рэспубліканскай канфедэрацыі прадпрымальніцтва: "Мы разумеем асноўныя сферы прадпрымальніцтва: адкрыццё, падключэнне да электраэнергіі, атрыманне крэдытаў, дзе, у якой краіне лепш або горш. Патрэбныя ж нейкія фармальныя прылады, каб гэта параўнаць. Зразумела, гэта трэба і для фундатараў, і для таго, каб мы разумелі, да чаго нам імкнуцца. Дзе мы ўжо нядрэнна на агульным фоне выглядаем у свеце, а дзе нам трэба падцягвацца".

І яшчэ пару слоў аб рэзервах для далейшага паляпшэння сваіх пазіцый. Калі ў сістэме падаткаабкладання, каб застацца сацыяльна арыентаванай дзяржавай, на істотнае скарачэнне фіскальнай нагрузкі трэба ісці вельмі асцярожна, то працэдуры адміністравання падаткаў можна спрашчаць максімальна. Тое ж датычыцца і такіх пазіцый, як "вырашэнне неплацежаздольнасці прадпрыемстваў", "атрыманне крэдытаў" або "падключэнне да сістэмы электразабеспячэння". Гэты фактар іграе значна больш важную ролю, чым можа здацца.

Паступальны рух Беларусі ў эканамічных ператварэннях мы самі не лічылі ніколі рэвалюцыйным, але тым, хто папракае краіну ў адсутнасці рэформ, варта звярнуць увагу на статыстыку ад Сусветнага банка.

Пачынаючы з 2006 года, у Беларусі зафіксаваныя 32 рэформы! Наша краіна прызнаная адным з вядучых у свеце рэфарматараў і займае чацвёртае месца сярод 189 краін па колькасці рэформ ва ўсіх сферах дзейнасці за апошнія 10 гадоў. Так што, карысна часам зазірнуць у рэйтынгі, дзе лічбы часам гавораць значна больш за словы.