Жыхары вёскі Сяргеевічы жывуць у паўразбураным будынку

Калі паўразбураны дом становіцца нормай жыцця! З даху цячэ вада, вокны выбітыя, а сам будынак пакрыўся трэшчынамі. З такімі праблемамі жыхары шматкватэрнага дома ў вёсцы Сяргеевічы Пухавіцкага раёна звярнуліся на гарачую лінію праграмы. Нашы журналісты высветлілі: будынак належыць сельгасарганізацыі, якая не спяшаецца з капрамонтам. Акрамя таго, у аб'екта, большая частка якога нежылая, не ўсё ў парадку з дакументамі. У сітуацыі разбіраўся Аляксей Кандраценка. 

Лілія Падаляк адпрацавала ў гаспадарцы "Сяргеевічы" 34 гады, увесь гэты час жыве ў невялікай кватэры. Зараз на пенсіі. Двухпавярховы дом у вёсцы за дзесяцігоддзі састарэў, дах таксама.

У доме ёсць электрычнасць, вадаправод, у кватэрах печкі для ацяплення. А вось звонку будынак выглядае не так прывабна, і жылым яго цяжка назваць. Дастаткова выйсці на вуліцу, каб пераканацца ў гэтым. Большасць кватэр пустуе, вокны выбітыя, увогуле - поўная разруха. 

Такія цагляныя дамы, як гэты, у свой час будавалі на стагоддзі. Але гэтаму, як відаць, не пашанцавала. І вінаватыя ў такой жыллёвай драме, як высветлілася, яго некаторыя былыя жыхары. 

Андрэй Папельскі,  дырэктар ААТ "Зазерка":   "Літаральна 2-3 месяцы таму гэтыя сцены яшчэ былі на месцы. Гэта ж вандалізм! Прычым ніхто з боку не прыйшоў, каб красці. Людзі дайшлі да таго, што пачалі зрываць падлогу, каб абаграваць свае памяшканні. Гэта, я нават не ведаю, не чалавеча!" 

Двухпавярхоўка некалі належала гаспадарцы "Сяргеевічы".  Пазней яе далучылі да суседняй - "Зазеркі". Разам з актывамі - а гэта землі, тэхніка, ферма - адышлі і пасівы. Імі і стаў гэты дом. Прычым  сярод яго жыхароў сёння - толькі адзін супрацоўнік сельгаспрадпрыемства. А ўсяго заселена сем кватэр. Яны не прыватызаваныя. А галоўнае - усе дакументы на дом проста зніклі.  

Андрэй Папельскі,  дырэктар ААТ "Зазерка":   "Пасля абследавання гэтага жылля мы былі ўражаныя тым, што нам давялося прыняць. А калі паўстала пытанне далейшага разгляду, мы, куды ні біліся, дзе ні шукалі, не маглі знайсці якую-небудзь дакументацыю па гэтым жыллі. Таму мы прынялі рашэнне выдаткаваць частку сродкаў гаспадаркі, аформіць у першую чаргу зямлю пад гэтае жыллё, потым зрабіць тэхнічную характарыстыку па дамах. І на сёння гэта ўсё зроблена". 

Нягледзячы на тое што дом у камунальнай уласнасці аграрыяў, за лёсам людзей сочыць і Навапольскі сельскі выканкам. Разглядаецца варыянт пераезду ў суседні дом. Ён у добрым стане. Можна ўзяць і зямельныя ўчасткі. Але патрэбная ініцыятыва саміх вяскоўцаў.  

Вольга Жукавец, кіраўнік спраў Навапольскага сельскага выканкама:  "Ахвотнікі маглі б стаць на чаргу тых, хто мае патрэбу ў паляпшэнні жыллёвых умоў, і паляпшаць іх самастойна. Якім чынам? Атрымаць зямельны ўчастак, яны гэта могуць зрабіць на льготных падставах, пры ўкладанні ўласных сіл і сродкаў. Яны могуць узвесці тут сабе хаткі. Зноў жа са шматдзетных тут ужо ніхто не пражывае. Была адна сям'я, ёй была ў пасёлку Дружны пададзена адна кватэра сацыяльная. Яна свае жыллёвыя ўмовы палепшыла. Могуць яны самі, патрэбна іх ініцыятыва, нейкім іншым чынам паляпшаць, калі ім не спадабаецца пераезд у гэты дом". 

Сітуацыю з праблемным домам у вёсцы Сяргеевічы разглядае і Пухавіцкі райвыканкам. Туды накіравалі ліст. Сваё слова скажуць спецыялісты жыллёва-камунальнай гаспадаркі, юрысты. Не выключана, што агульнымі намаганнямі дамовяцца аб правядзенні калі не капітальнага, то касметычнага рамонту.