Азнаёміцца з магчымасцямі беларускага АПК прыехалі кампаніі з 28-мі краін. На адкрытай пляцоўцы "Белагра" прапанавана больш за 300 найноўшых узораў. Найбуйнейшая сельгасвыстава адкрыла праграму Беларускага аграпрамысловага тыдня. Тут і навінкі сельгастэхнікі, інавацыі ў тэхналогіях, а таксама дасягненні ў галіне харчавання і перапрацоўкі прадукцыі. Невыпадкова "Белагра" называюць самай смачнай экспазіцыяй краіны. Зрэшты, выстава - гэта і насычаная дзелавая праграма. Штогод яна адзначаецца візітамі самага высокага ўзроўню.
Аб прыкметных навінках выставы - Вольга Анішчанка. Каб уявіць геаграфічны размах "Белагра-2018", дастаткова зірнуць на гэты парад флагаў. Амаль тры дзясяткі краін і больш за паўтысячы кампаній!
Як максімальна эфектыўна апрацаваць глебу, без страт сабраць і захаваць ураджай, а пасля падаць да стала сапраўдныя далікатэсы? Увесь тыдзень "Белагра" будзе прэзентаваць самыя разумныя машыны, тэхналогіі і дасягненні аграрнай навукі з ўсяго свету.
Але справядлівасці дзеля зазначым, "Белагра" - месца прыцягнення не толькі спецыялістаў-аграрыяў. Тут можна купіць самыя смачныя ўзоры беларускай селекцыі.
Прадэгусціраваць і аддаць свой голас за лепшы беларускі прадукт.
І нават пакаштаваць гарачай юшкі! Рыбацкая вёска зазывае на свежы абед на прыродзе. Ды і пратэсціраваць літаральна любую машыну. Тут няма ніякіх забарон!
Аб тэхніцы, дарэчы, сёлета ўсё больш гавораць у звязцы з тэхналогіямі. Вось новая распрацоўка навукоўцаў. Шырокай публіцы паказваюць упершыню. Бартавы камп'ютар дапаможа і засеяць, і ўнесці ўгнаенні. Прычым, разлічыць маршрут машыны з высокай дакладнасцю. Падлічана, што толькі на адным гектары гаспадарка сэканоміць паўсотні долараў. У маштабе краіны - сотні тысяч!
Сёння навукоўцы ўпэўненыя: будучыня АПК - за лічбавымі тэхналогіямі. Праграмамі, якія самі здольныя разлічыць, як атрымаць высокі ўраджай пры мінімальных выдатках. Прычым, вырашаць любыя задачы аграрыяў будзе беларуская тэхніка. За апошнія гады яна навучылася забяспечваць патрэбнасці сяла на 80 %.
А неўзабаве ў палі будуць выходзіць не толькі машыны і людзі. На варце дакладнага земляробства - беспілотнікі. Сумесная беларуска-кітайская распрацоўка. Такі квадракапцёр заменіць цяжкую працу аграрыя і аператыўна падкажа гаспадару, што паправіць у працы, каб зберагчы ўраджай.
Свой арганічны прадукт на "Белагра" ўпершыню. Менавіта аб такім гавораць "натуральны". Без хімсродкаў абароны, антыбіётыкаў, гармонаў росту. Пакуль на прынцыпах такога земляробства ў краіне стаяць толькі два дзясяткі фермераў. Але каб па-сапраўднаму адкрыць такі здаровы прадукт нават на сваім рынку, патрэбен асаблівы закон. Ён дазволіць сапраўды маркіраваць арганіку, зрабіўшы яе вядомай для пакупніка.
Прэм'еру на "Белагра" падрыхтавала кандытарская галіна. "Камунарка" прывезла на выставу новы шакалад "Прэзідэнт эксклюзіў" - працяг вядомага праекта. Кіраўнік фабрыкі ўпэўнівае: такі шакалад беларусы яшчэ не елі. Рэцэптура ўнікальная. Але гэта не робіць яго недаступным для спажыўца. Цана будзе цалкам бюджэтнай. А пакаштаваць навінку беларусы змогуць ужо ў бліжэйшы час.
Аб харчаванні як аб галоўным складальніку беларускага экспарту на адкрыцці выставы абавязкова нагадае ўрад. АПК прыбаўляе. З пачатку года больш і вырабілі, і паставілі. Яшчэ б больш дакладнасці з галоўным імпарцёрам беларускіх прадуктаў - наракае профільны міністр. Напярэдадні Расія зноў заявіла аб часовых абмежаваннях на пастаўку малочнай прадукцыі. Усё, што ў тары больш як 2,5 літра, ужо заўтра пад забаронай. Як гаворыцца, не чакалі, але былі гатовыя.
Спадзяванне на новае кіраўніцтва расійскага Мінсельгаса - адзначае міністр. Важна стварыць умовы, каб усе нарматыўныя акты ў рамках Саюзнай дзяржавы працавалі. Парушаць саюзныя дамоўленасці - апошняя справа.
Між тым, "Белагра" працягвае сустракаць гасцей, у тым ліку са шматлікіх расійскіх рэгіёнаў, наладжваць партнёрскія сувязі. Да канца тыдня тут чакаюць дэлегацыі з двух дзясяткаў краін. Каб убачыць і паспрабаваць усё самае смачнае і забяспечыць самы кароткі шлях да новых кантрактаў і пагадненняў.
