Такое даручэнне сёння даў Кіраўнік дзяржавы па выніках сустрэчы з віцэ-прэзідэнтам гэтай краіны. Эмерсан Мнангагва ўпершыню ў Беларусі, і чакаецца, што гэты візіт можа стаць знакавым ва ўзаемаадносінах дзвюх краін. У дыпламатычных і палітычных кантактах рознагалоссяў няма, а вось эканамічнае супрацоўніцтва трэба пашыраць. Паўднёваафрыканскія партнёры сур'ёзна зацікаўленыя развіваць адносіны з Беларуссю ў машынабудаванні, горназдабыўной прамысловасці, будаўніцтве і сельскай гаспадарцы. Нас Зімбабвэ ў першую чаргу цікавіць як выхад на вялізны рынак усяго афрыканскага рэгіёна. Пра новую старонку беларуска-зімбабвійскага супрацоўніцтва ў рэпартажы Дар'і Белавусавай-Пятроўскай.
Гэты каток для ўшчыльнення грунту ад беларускага Амкадора ўжо даўно зарэкамендаваў сябе не толькі за межамі краіны, але і кантынента. Напрыклад, вялікая партыя такой тэхнікі ўжо некалькі гадоў працуе ў Лівіі. Зусім нядаўна быў падпісаны кантракт з Бангладэш, і вось зараз у айчыннага прадпрыемства новы партнёр - Зімбабвэ.
Паўднёваафрыканскіх партнёраў цікавіць не толькі дарожная і будаўнічая тэхніка.
У Зімбабвэ вялізная колькасць прыродных багаццяў. Па пакладах плаціны краіна на трэцім месцы ў свеце. Таксама тут вялікія радовішчы жалезных руд, золата, медзі, каменнага вугалю і каштоўных камянёў, алмазаў, рубінаў і ізумрудаў.
Нягледзячы на тое што ў краіне ідзе актыўнае развіццё горназдабыўной галіны, большасць тэрыторый дагэтуль застаецца неразведанай. І беларуская тэхніка паказала сябе, што называецца, у працы. На вугальным кар'еры "Хвангэ" ўжо працуюць нашы БелАЗы.
Зімбабвэ мае патрэбу не толькі ў пастаўках беларускай тэхнікі. У першую чаргу іх цікавіць стварэнне сэрвісных цэнтраў. І сёння Кіраўнік дзяржавы даў даручэнне прапрацаваць гэтае пытанне. І, магчыма, у будучыні ў Паўднёвай Афрыцы з'явіцца адзіны сэрвісны цэнтр, які аб'яднае буйныя айчынныя кампаніі - БелАЗ, МТЗ і Амкадор.
Аляксандр Лукашэнка не раз падкрэсліваў: Афрыканскі кантынент - перспектыўны эканамічны партнёр. І Беларусь гатовая на даўгачаснае супрацоўніцтва. Для параўнання:
Супольнасць развіцця поўдня Афрыкі (або скарочана САДК) - буйное рэгіянальнае эканамічнае аб'яднанне. У яго ўваходзяць 15 дзяржаў з насельніцтвам амаль 300 мільёнаў чалавек. Аб'ём ВУП - каля 220 мільярдаў долараў ЗША.
Гэта не проста вялікі, гэта вялізны рынак, які мае патрэбу ў тэхніцы, прадуктах харчавання, калійных угнаеннях. І Беларусь гатовая гэта прапанаваць.
Таму, прымаючы сёння ў Каміннай зале Палаца Незалежнасці віцэ-прэзідэнта Зімбабвэ, беларускі лідар называе візіт Эмерсана Мнангагвы гістарычным. Аляксандр Лукашэнка перакананы, што нашы краіны адкрываюць новую старонку ў эканамічным супрацоўніцтве, бо Зімбабвэ для Беларусі - гэта выхад на вялізны рынак усяго афрыканскага рэгіёна.
Эмерсан Мнангагва, віцэ-прэзідэнт Зімбабвэ: "Паважаны спадар Прэзідэнт, мэта майго візіту - пашырэнне і паглыбленне супрацоўніцтва Беларусі і Зімбабвэ. Я цалкам салідарны з вамі ў тым, што ў палітычных адносінах у нашых краін няма ніякіх праблем. Таму мы зацікаўленыя ў пашырэнні гандлёва-эканамічнага ўзаемадзеяння, а таксама супрацоўніцтва ў такіх галінах, як інфраструктура, сельская гаспадарка і горназдабыўная прамысловасць. Нам таксама вядома пра бягучую палітычную сітуацыю ў Беларусі. Павінны прызнаць, што, як і ваша краіна, мы аказваліся пад націскам санкцый. І ў гэтай сувязі мы лічым, што нам неабходна нарошчваць як палітычныя кантакты, так і ўзаемадзеянне ў гандлёва-эканамічнай сферы".
У сваю чаргу Зімбабвэ можа прапанаваць Беларусі якасную бавоўну і тытунь - яго лічаць адным з лепшых на афрыканскім мацерыку. Таксама краіна вырабляе вялікія аб'ёмы высакаякаснай сталі. Сур'ёзны патэнцыял супрацоўніцтва ёсць у сферы адукацыі, навукі і ваенна-тэхнічнай галіне. Нельга забываць і пра турыстычны бізнес. Шукальнікаў прыгод Зімбабвэ вабіць экзатычнай прыродай і жывёламі, а таксама адной з галоўных славутасцяў усёй Паўднёвай Афрыкі - вадаспадам Вікторыя. Гэта адзіны вадаспад, які ўваходзіць у сем прыродных цудаў свету. Вялізны паток вады, што падае з вышыні, утварае высокае воблака вадзянона туману, які ў ясны дзень можна ўбачыць з адлегласці 20 км.
Перамовы з паўднёваафрыканскімі партнёрамі прадоўжыліся ў Доме ўрада. З віцэ-прэзідэнтам Зімбабвэ сустрэўся прэм'ер-міністр краіны Андрэй Кабякоў. Быў падпісаны мемарандум аб паразуменні паміж урадамі дзвюх краін наконт пастаўкі беларускай тэхнікі. Наша краіна прапануе сучасныя фінансавыя механізмы і прывабныя ўмовы продажу айчыннай тэхнікі. У прыватнасці, гэта датычыцца экспартнага крэдытавання і паставак на ўмовах міжнароднага лізінгу.
