У Беларусі дадуць больш волі бізнесу, але павінен быць выкананы баланс у плане адказнасці за парушэнні. Гэта лейтматыў сённяшніх сустрэч у Прэзідэнта з кіраўніком Мінэканомікі і дырэктарам Нацыянальнага цэнтра заканадаўства і прававых даследаванняў. Аляксандр Лукашэнка падтрымаў ініцыятывы ўрада па разняволенні дзелавой ініцыятывы. Праца над ліберальным пакетам дакументаў для бізнесу працягваецца. Галоўнае - нормы павінны быць дзейснымі і зразумелымі для людзей. Гэтым разам абмяркоўваліся новаўвядзенні, якія закрануць рамеснікаў і агратурызм. У дэталях разбіралася Наталля Брэвус.
Пра тое, што самае галоўнае - надвор'е ў доме, думалі Шаўцовы, калі 10 гадоў таму на хвалі новай цікавасці да аграэкатурызму вырашылі ўсёй сям'ёй сысці ў бізнес з галавой. Цёплая атмасфера, мясцовы каларыт і маляўнічыя месцы Аршанскага раёна сталі візітнай карткай іх сядзібы. Барыс - майстар на ўсе рукі, так што было нескладана ўладкаваць некалі закінутую тэрыторыю. Лазня, утульныя хаткі - усё ў адзіным стылі. Па каларыт сюды прыязджаюць не толькі госці з Кітая, але з Польшчы, Латвіі, Літвы, Германіі. Моладзі ўсё больш даспадобы кантры-стыль. Расіяне, напрыклад, не супраць праводзіць тут вяселлі і юбілеі - душэўна і па кішэні.
Актыўна зарабляць на гасціннасці пачалі ў Беларусі менавіта 10 гадоў таму. Узяліся за справу, за нарматыўную базу. З тых часоў колькасць аграсядзібаў вырасла ў 40 разоў - з некалькіх дзясяткаў да больш як двух тысяч. Перш былі абмежаванні для працы. Але зараз гаспадары змогуць аказваць шэраг дадатковых паслуг - напрыклад, праводзіць банкеты. Падавалася б, дробязь, а якая запамога прадпрымальнікам з сяла. Гэтыя навацыі прапаноўвае Мінэканомікі.
Праца над ліберальным пакетам дакументаў для бізнесу завяршаецца. Крок за крокам разбіраліся з кожнай сферай. Рабочая група сядзела крукам над карэкціроўкамі з пачатку года. Тады ад Кіраўніка дзяржавы прагучаў галоўны пасыл - рассячы гордзіеў вузел праблем, які тармозіць развіццё бізнесу.
Апошні тэрмін для ўрада - 1 кастрычніка. Менавіта да гэтай даты павінны быць гатовыя ўсе дакументы з ліберальнага пакета. Навацыі, якія не проста палепшаць бізнес-клімат, але і заахвоцяць прадпрымальніцтва і занятасць людзей. Мінулы тыдзень стаў вызначальным для МАРГ і падатковага ведамства. Сёння прадстаўленыя чарговыя важныя крокі для разняволення дзелавой ініцыятывы.
Мінэканомікі разлічвае на прыток прадпрымальнікаў не толькі ў агратурызме, але і сярод рамеснікаў. Гэтым разам абмяркоўваліся прапановы, якія закрануць і іх. Зараз налічваецца 23 000 рамеснікаў у краіне. Паводле прагнозу ўрада, іх стане ўдвая больш. На фоне масавай вытворчасці ўсё больш шануецца ручная праца, каларыт і ўнікальнасць. Для Таццяны Шавель хобі - жанчына стварае брошкі з камянёў - стала сапраўдным рамяством. Сам сабе Свароўскі, жартуе ўмеліца. Сёння матылькі, жукі, буслы, зробленыя Таццянай, разляцеліся па свеце. Ёсць і сталыя пакупнікі. Асноўная пляцоўка для прэзентацыі вырабаў - сацыяльныя сеткі. Яркія брошкі - у пашане ў модніц.
Афіцыйная рэгістрацыя ў падатковай дае права ўдзельнічаць у разнастайных выставах-продажах. Без рэгістрацыі допуск туды закрыты. Рамесная дзейнасць у Беларусі рэгламентаваная. Былі абмежаванні на гандаль - прадаваць можна было на рынках або выставах альбо аддаваць на рэалізацыю юрасобам або ІП. Не заўсёды выгадна. Зараз стане больш свабоды дзеянняў у распаўсюджванні вырабаў. Для многіх гэта лішняя капейка. Асабліва для вяскоўцаў. Таццяна - хутчэй выключэнне. Амаль 80 працэнтаў рамеснікаў родам з вёскі. Мінэканомікі прапанавала максімальна пашырыць пералік відаў рамесніцкай дзейнасці. А таксама разгледзець магчымасць перадачы такім умельцам нявыкарыстаных памяшканняў. У праект указа норму не ўключылі. Такое права і так ужо ёсць у мясцовай улады. У гэтым пытанні Прэзідэнт звяртае ўвагу на ўзважаны падыход.
"Кантраляваць нельга адпусціць" - з пачатку года ўрад спрабуе правільна расставіць знакі пунктуацыі ў гэтым няпростым спалучэнні. Усе прапануемыя карэкціроўкі заканадаўства павінны быць своечасовымі, жывымі, а праекты ўказаў - узважанымі і, галоўнае, зразумелымі для людзей.
Больш вагі зараз будзе і ў Савета па развіцці прадпрымальніцтва. Паводле задумы, ён павінен аб'ядноўваць дзелавых людзей краіны, акумуляваць ідэі бізнесу і быць правадыром ініцыятыў прадпрымальніцкай супольнасці. Згодна з праектам указа, савет атрымлівае шэраг дадатковых паўнамоцтваў. Зможа ўдзельнічаць у распрацоўцы дакументаў па бізнесе і напроста ўносіць заканадаўчыя прапановы ў Савет Міністраў.
Гэта пазітыўна адаб'ецца на эканамічнай сферы. Пакуль яшчэ хуткі рост сёлета стрымлівае будаўнічая сфера, фінансавае становішча прадпрыемстваў, недахоп абаротных сродкаў, але крок за крокам эканоміка аднаўляецца. У такой сітуацыі, ды і ў цэлым, Аляксандр Лукашэнка вітае большую свабоду дзеянняў для прадпрымальнікаў наўзамен на адказнасць бізнесу.
Не памыляецца толькі той, хто нічога не робіць. Вось ужо сапраўды. Часта датычыцца бізнесу. Ад памылак ніхто не застрахаваны. За парушэнні ў бізнес-сферы маюць намер знізіць штрафы і скараціць выпадкі ўжывання канфіскацыі. На гэта часта скардзіліся прадпрымальнікі. Падтрымку Кіраўніка дзяржавы знайшлі карэкціроўкі адміністрацыйнага заканадаўства.
Кіраўнік дзяржавы адобрыў закладзеныя ў законапраекце падыходы і даручыў распрацаваць пытанне аб занясенні дакумента на разгляд у парламент. Дакумент прагрэсіўны, шматлікія краіны ідуць менавіта гэтым шляхам.
У абмеркаванні ўсіх ліберальных ініцыятыў яшчэ рана ставіць кропку. На наступным тыдні ўрад прадставіць прапановы па пытаннях ліцэнзавання. Гэта важная тэма для бізнесменаў. Судзячы па гутарках у кулуарах, рэвалюцыйнымі будуць змены пажарных і санітарных норм. І толькі пасля гэтага пакет дакументаў па спрашчэнні вядзення бізнесу можна будзе лічыць завершаным.
