У профільным міністэрстве прагназуюць рост колькасці атрымальнікаў безнаяўных жыллёвых субсідый. Нагадаем, звярнуцца па дапамогу ў аплаце камуналкі могуць гараджане, якія выдаткоўваюць на паслугі ЖКГ больш за 20 % свайго даходу. Для вяскоўцаў гэтая планка зніжаная да 15 %. Механізм выплат у Беларусі ўжо адпрацаваны да дробязяў. За першыя паўгода субсідыямі скарысталіся больш за 11 тысяч беларусаў.
Як атрымаць адрасную дапамогу? Вольга Анішчанка распытала спецыялістаў. Тут адсочваюць кожнага, хто просіць падставіць плячо ў аплаце камуналкі. У сталічную службу субсідзіравання сцякаюцца звесткі з усяго горада. А таму тут сапраўды ведаюць, каму адмовілі і чаму, а каго падтрымалі і наколькі.
Гавораць, як правіла, пакет дакументаў не поўны. Грамадзянін забывае прыкласці пашпарт або працоўную кніжку, але часцей даведку аб даходах. А між тым дакумент ледзь ці не галоўны.
Ад таго, які даход, залежыць уся арыфметыка. Але важна, каб за апошнія паўгода (а разлік вядуць за 6 месяцаў) грошы былі. Бо калі заяўнік не працаваў і на ўліку ў службе занятасці не стаяў, разлічыць дзярждапамогу немагчыма.
Заявы ад грамадзян прымаюць разлікова-даведкавыя цэнтры. На разгляд ідзе да 20 рабочых дзён. Г.з. калі звярнуцца, напрыклад, заўтра, адказ прыйдзе ў першай палове лістапада. Адправяць поштай. Суму субсідыі атрымальнік убачыць на спецыяльным бланку паведамлення, а пасля і ў жыроўцы. Але ўжо ў снежні.
Аднак звяртацца па дапамогу трэба не ўсім. Для пенсіянераў (але толькі непрацуючых) і інвалідаў, чыя даходы празрыстыя, спецыяльная інфармацыйная сістэма субсідыю разлічыць сама. Ніякіх даведак і асабістых зваротаў. Такіх, дарэчы, сярод атрымальнікаў 90 %.
Новая сістэма дзяржпадтрымкі пры аплаце камуналкі прайшла першую абкатку часам. Механізм жыллёвых субсідый запускалі роўна год таму, з кастрычніка, як раз да абагравальнага сезона. Фактычна як першы сігнал: эканоміка краіны паступова сыходзіць ад цяжару перакрыжаванага субсідзіравання, калі затраты ў сістэме нясуць па большай частцы прадпрыемствы, а дапамога ў аплаце жыллёва-камунальных паслуг будзе выключна адраснай. Г.з. толькі тым, каму больш патрэбна.
Але толькі сацыяльны статус - не гарантыя дапамогі. Калі ва ўласнасці не адна кватэра або нават пакой - у субсідыі адмовяць нават непрацуючаму пенсіянеру. Яшчэ адна прычына адхіліць заяўку – дагавор здачы жылля ў арэнду. А вось даўгі за камуналку - не падстава для адмовы.
Сярэдняя велічыня субсідыі - 200 рублёў на паўгода. Пераразлік штомесячны. Як-ніяк тарыфы не пастаянныя. Але штораз аб змяненнях сумы субсідыі атрымальніка папярэдзяць паштовым паведамленнем.
Прыкметны прырост атрымальнікаў субсідый чакаюць на працягу месяца. Бо кастрычніцкія жыроўкі цяжэйшыя ужо на траціну. Але спецыялісты раяць: перш чым збіраць дакументы, лепш высветліць дакладна, ці варта разлічваць на дапамогу. Падкажуць у службах субсідзіравання або разлікова-даведкавых цэнтрах, супаставіўшы даходы і сумы рахунак-паведамленняў.
