Шляхі чорнага золата ў Беларусь

Пакуль ідуць спрэчкі і не выконваецца міжурадавае пагадненне Масквы і Мінска, пастаўкі нафты ў Беларусь па сусветнай цане без прэмій здзяйсняе шэраг незалежных расійскіх кампаній. Таксама ў лютым мы ўжо перапрацавалі партыю якаснай нафты з Нарвегіі, а ў сакавіку анансаваныя пастаўкі лёгкай нафты з Азербайджана.

Умовы і крыніцу пастаўкі 6 мільёнаў тон нафты мы разлічваем даведацца ўжо на наступным тыдні. І калі яна не расійская - размова можа ісці аб глабальным пераглядзе ўсяго еўрапейскага рынку чорнага золата. Пакуль на стале прапановы амерыканцаў, краін Персідскага заліва, Нарвегіі і бліжэйшага нам саюзнага Казахстана. 

Больш падрабязна аб альтэрнатывах даведаемся ў нашага эканамічнага аглядальніка Святланы Лук'янюк. 

Для нас, пакупнікоў, чым больш прапаноў на рынку тавараў або паслуг, тым лепш. Можна прыцаніцца, ды і якасць лепш паразглядваць. Іншымі словамі, канкурэнцыя заўсёды больш выйгрышная і выгадная, чым манаполія. Яна патрэбна толькі там, дзе аб'ектыўна суперніцтва проста няма або яно абыдзецца больш дорага. У іншых выпадках - альтэрнатыва заўсёды плюс. Таму мы адкрываем новыя рынкі для сваіх тавараў, каб не залежаць ад аднаго пакупніка і яго кашалька.

Не менш важная і вялікая геаграфія прапаноў. Па той жа нафце. Адзін пастаўшчык - гэта заўсёды ў большай ступені яго ўмовы на першым месцы. І дамовіцца "на сваё" складана. Аб гэтым Прэзідэнт гаварыў на нарадзе па эфектыўнасці нашай нафтаперапрацоўкі (відэа).

Так, улічваючы няпростыя перамовы з Расіяй, якія паўтараюцца з года ў год, Прэзідэнт даў выразнае даручэнне ўраду працаваць над дыверсіфікаваннем паставак. Беларусь лічыць эканамічна немэтазгодным, ды да таго ж, бессэнсоўным плаціць прэміі расійскім нафтавым кампаніям у ранейшых аб'ёмах (відэа). 

У цяперашніх умовах альтэрнатыўныя крыніцы проста неабходныя. У выніку прапановы не прымусілі сябе доўга чакаць і з поўначы, і з поўдня. Зараз аб лагістыцы.

Гэта нафтаправод "Адэса - Броды". Ён гатовы дастаўляць да нас нафту з Чорнага мора. Гэтая сыравіна ад нафтавай дзяржкампаніі Азербайджана Socar. Яна пацвердзіла: супрацоўніцтва будзе доўгатэрміновым. Толькі ў сакавіку - тры танкеры. Агульны аб'ём - 250 тысяч тон нафты з поўдня па шляху праз Украіну. За год чакаем да мільёна. Гэта для Мазырскага НПЗ.

Гэта паўночны кірунак. Для "Нафтана" першы танкер з расійскай нафтай ад трэйдараў ужо прыбыў на тыдні ў порт Клайпеды. Ледзь раней там прымалі і нарвежскую сыравіну. Зараз дарога ўжо па чыгунцы. Дамовіліся аб пастаўках 160 тысяч тон расійскай нафты праз трэйдараў без прэміі. 

Дарэчы, гэты балтыйскі кірунак можна паскорыць трубаправодным спосабам. Аб гэтым гаварылі і на нарадзе. Прэзідэнт нагадаў аб сур'ёзных намерах з боку ЗША. Размова як раз аб фінансавай запамозе на будаўніцтва балтыйскай трубы. 

Заходні кірунак - нафтаправод "Дружба". Канцэрн "Белнафтахім" не выключае рэверсных паставак сыравіны да нас праз Польшчу да канца года. Аператар польскага ўчастку заявіў аб планах транспартоўкі сырой нафты ва ўсходнім кірунку. І мы гатовыя да перамоў, як і з іншымі партнёрамі - па казахстанскай, румынскай, блізкаўсходняй (іракскай і іранскай) нафце. Тут галоўнае пралічыць лагістыку і сысціся па кошце. У цяперашніх умовах, калі сусветныя цэны на чорнае золата падаюць, можна таргавацца.

Каціроўкі нафты працягваюць зніжацца ў чаканні рашэння АПЕК аб скарачэнні здабычы. Напярэдадні таргі завяршыліся на адзнацы для маркі Brent 49 долараў за барэль. Зараз гэта мінімум больш чым за два гады. Падзенне з пачатку года амаль на чвэрць.