"Вёскі будучыні" з'явяцца ў Беларусі. Канцэпцыю маштабнага праекта па развіцці сельскіх населеных пунктаў распрацоўвае Міністэрства архітэктуры і будаўніцтва. Сёння пра гэта заявіў віцэ-прэм'ер Міхаіл Русы на сумесным пасяджэнні абедзвюх палат парламента. Ужо вызначаны пілотныя аграгарадкі ў кожнай вобласці.
За аснову возьмуць перадавыя гаспадаркі. Як прыклад, аграгарадок Верцялішкі або вёска Копысь. Галоўная мэта - забяспечыць годны ўзровень жыцця на сяле, тым самым прыцягнуць у глыбінку маладых спецыялістаў. Пачаць працаваць праект павінен ужо ў наступным годзе.
Урад абяцае забяспечыць вяскоўцаў і зарплатамі. У сельскай гаспадарцы ў снежні яны ў сярэднім дарастуць да 700 рублёў. Не знята і задача выхаду на тысячу. Яе будуць вырашаць на працягу наступнага года.