Беларусь стала прывілеяваным партнёрам Францыі. Аб гэтым гаварылі сёння падчас сустрэчы старшыні Савета Рэспублікі Міхаіла Мясніковіча з дэлегацыяй групы дружбы "Францыя-Беларусь" Нацыянальнага сходу гэтай краіны. У планах - актывізаваць інвестыцыйнае супрацоўніцтва. Сёння лічбы гавораць, што наша краіна больш купляе ў Францыі, чым экспартуе. Падчас сустрэчы абмяркоўваліся пэўныя праекты ў сферы сельскай гаспадаркі, прамысловасці, адукацыі і турызму, накіраваныя на дыверсіфікаванне экспарту.
Міхаіл Мясніковіч, старшыня Савета Рэспублікі Нацыянальнага сходу Беларусі: "Сёння мы экспартуем тавараў і паслуг дзесьці каля 100 мільёнаў, а 200 мільёнаў з лішнім купляем па імпарце. Таму такая стаіць задача, каб найбліжэйшыя 3-4 гады значна сальда палепшыць".
Падчас сустрэчы бакі абмеркавалі ўзаемадзеянне на міжнародных пляцоўках. У прыватнасці, беларускія парламентарыі разлічваюць на падтрымку французскімі калегамі рэзалюцыі па лічбавай эканоміцы. Яе Беларусь прадставіць на летняй сесіі ПА АБСЕ ў Берліне. Гаварылі і аб перспектывах супрацоўніцтва паміж рэгіёнамі.
