Беларусь прымае форум Альянса за фінансавую даступнасць

Беларусь у гэтыя дні стала пляцоўкай міжнароднага ўзроўню. Наша краіна прымае  маштабны форум Альянса за фінансавую даступнасць. Арганізацыя аб'ядноўвае банкі і іншыя профільныя ўстановы больш як 90 краін. Якое развіццё чакае фінансавы сектар? Якімі будуць банкі будучыні і як забяспечыць абарону грошам у эпоху лічбавых тэхналогій? Вольга Анішчанка пагутарыла з экспертамі форуму.

Як зберагчы і прымножыць капітал? Для размовы пра фінансы, якія, як вядома, любяць цішыню, нават месца выбралі спакойнае. Раўбічы, удалечыні ад мегаполіса. Тут - навучальны цэнтр галоўнага банка краіны Нацбанка. Сюды сваіх прадстаўнікоў адправілі яшчэ каля 50 найбуйнейшых фінансавых устаноў Усходняй Еўропы і Цэнтральнай Азіі. Усе яны члены міжнароднага аб'яднання - Альянса за фінансавую даступнасць. Ён адказвае за развіццё нацыянальных фінансавых сістэм.

Чаму краіны зацікаўленыя развіваць фінансавыя рынкі разам? Эксперты тлумачаць: фінсектар - піянер ва ўкараненні лічбавага начыння. А тэхналогіі пераадольваюць межы: мы карыстаемся банкаўскімі картамі па ўсім свеце, пераводзім грошы на іншыя кантыненты, адкрываем рахункі ў замежных банках. Свет становіцца лічбавым. Важна ўніфікаваць падыходы разам. Так, яшчэ некалькі гадоў, і банкі сыдуць у анлайн. Сектар у чаканні новых ІТ-рашэнняў.

Вахтанг Абрамян, намеснік старшыні Цэнтральнага банка Арменіі: "Пытанні біяметрыі, ідэнтыфікацыі аддаленай на працягу найбліжэйшых 2-3 гадоў будуць асноватворнымі. І хутчэй за ўсё, мы ўбачым тут канцэптуальныя рашэнні, якія дадуць магчымасць нашым грамадзянам фізічна не прыходзіць у банк, каб адкрыць рахунак або ажыццявіць любую транзакцыю".

А пакуль Беларусь гаворыць пра свае дасягненні. Адзіная разліковая прастора, сістэма міжбанкавай ідэнтыфікацыі (кліент аднойчы рэгіструецца ў адным банку, каб пасля абслугоўвацца ў іншых). Вось-вось пачнуць працаваць імгненныя плацяжы. У працы яны круглыя суткі, без выхадных. І для падатковай, і для мытні. А неўзабаве беларусам прапануюць яшчэ і магчымасць скарыстацца базавым рахункам. Уся соль канцэпцыі - у адыходзе ад зарплатных праектаў, калі наймальнік, а значыць, і яго працаўнік прывязаныя да пэўнага банка. 

Сяргей Калечыц, намеснік старшыні праўлення Нацбанка Беларусі: "Мы гаворым пра тое, што людзі павінны самі выбіраць банк, у якім хочуць абслугоўвацца. І адна з магчымасцяў рашэння гэтага пытання - гэта стварэнне базавага рахунку. Базавы набор паслуг ён будзе атрымліваць бясплатна. Залічэнне, атрыманне сродкаў і г.д.".

Паралельна з развіццём новых сэрвісаў банкі выступаюць за бяспеку разлікаў. Гарантыі для кліентаў, што грошы дойдуць да патрэбнага адрасата ў тэрмін, - ключавы прынцып будучай працы. Ён лёг у аснову стратэгіі ў галіне фінансаў, прынятай на беларускім форуме.