Мінскі абласны суд праводзіць судовы разгляд па крымінальнай справе па факце смерці Аляксандра Коржыча. Першае пасяджэнне праходзіць у будынку суда Маскоўскага раёна. На лаве падсудных трое вайскоўцаў навучальнага цэнтра ў Пячах. Ім высунутыя абвінавачанні адразу па трох артыкулах Крымінальнага кодэкса: "Перавышэнне ўлады, якое пацягнула цяжкія наступствы - давядзенне да самазабойства", "Атрыманне хабару" і "Крадзеж". Абвінавачаным па гэтай справе пагражае ад 5 да 12 гадоў пазбаўлення волі.
Зараз наша здымачная група знаходзіцца ў будынку суда. На сувязь выходзіць карэспандэнт Юрый Шаўчук.
Пакуль ніякіх істотных заяў зроблена яшчэ не было, бо судовае пасяджэнне пачалося літаральна гадзіну таму.
У суд прыйшлі каля 20 вайскоўцаў. Усе яны, як і маці Аляксандра Коржыча, праходзяць па гэтай крымінальнай справе пацярпелымі. Акрамя мамы загінуўшага салдата, у судзе знаходзіцца і бабуля. Журналістаў тут вельмі шмат. Усе пакуль выйшлі, таму што было абвешчана, што працэс будзе закрытым для прэсы. Відэааператары і фатографы выйшлі з залы. Што датычыцца абвінавачаных, то іх імёны сталі ўжо вядомыя: Яўген Бараноўскі, Антон Важэвіч і Ягор Скуратовіч.
Асобна варта адзначыць той рэзананс, які выкліканы гэтым гучным судовым пасяджэннем. Нягледзячы на тое, што першае слуханне Мінскага абласнога суда праходзіць у выязным рэжыме ў самай вялікай зале судовых пасяджэнняў сталіцы - у судзе Маскоўскага раёна, усе ахвочыя тут ледзь змясціліся.
Акрамя вайскоўцаў і журналістаў на першае слуханне прыйшлі сябры, блізкія і родныя Аляксандра Коржыча. Нагадаем, цела Аляксандра Коржыча было знойдзена 3 кастрычніка мінулага года ў будынку на тэрыторыі воінскай часці ў Барысаўскім раёне.
Як высветлілася пазней, у павдвале медыцынскай роты мёртвы салдат знаходзіўся тыдзень. З поля зроку вайсковец быў страчаны пасля таго, як вярнуўся з медсанчасці. Расследаванне гібелі 21-гадовага салдата доўжылася паўгода. У дзень на допыт выклікаліся па 20-30 вайскоўцаў. Усяго было апытана каля 800 чалавек. Абвінавачанні высоўваюцца па трох артыкулах Крымінальнага кодэкса: "Перавышэнне ўлады, якое пацягнула цяжкія наступствы - давядзенне да самазабойства", "Атрыманне хабару" і "Крадзеж". Гэтыя ж абвінавачаныя праходзяць яшчэ па 150 эпізодах. Сваю віну ўсе трое падчас следства прызналі, але толькі часткова. Нягледзячы на тое, што менавіта дзеянні вайскоўцаў пацягнулі самазабойства Коржыча, крымінальная справа была ўзбуджана па артыкуле "Перавышэнне ўлады, якое пацягнуўшала цяжкія наступствы". Але гэта толькі юрыдычныя тонкасці, бо, па сутнасці, сяржанты былі начальнікамі Коржыча, а значыць, у першую чаргу гэта службовае злачынства.
Акрамя сяржантаў, якія знаходзяцца на лаве падсудных, па гэтай жа справе праходзілі 12 фігурантаў. Але паколькі іх дачыненне да смерці Аляксандра Коржыча даказана не было, гэтыя крымінальныя справы былі вылучаныя ў асобную вытворчасць. Абвінавачаным можа пагражаць да 12 гадоў пазбаўлення волі.
