Жудасная трагедыя адбылася сёння - у самы разгар асенніх канікул - у Магілёве. У недабудаваным прыватным доме ў мікрараёне Спадарожнік - дзе без нагляду гулялі дзеці, упала пліта перакрыцця. Пад заваламі апынуліся двое школьнікаў 9 і 10 гадоў. Адзін загінуў на месцы, другі - у цяжкім стане дастаўлены ў рэанімацыйнае аддзяленне абласной дзіцячай бальніцы. На месцы здарэння працуе аператыўна-следчая група. Узбуджана крымінальная справа. Падрабязнасці ў нашага карэспандэнта Андрэя Ястрабава.
Паведамленне аб надзвычайным здарэнні на цэнтр аператыўнага ўпраўлення гарадскога аддзела па НЗ паступіла ў 15:46. Гэтыя кадры зробленыя літаральна праз пару хвілін пасля абвальвання пліты на месцы будаўніцтва прыватнага дома. Пад заваламі апынуліся двое дзяцей 9 і 10 гадоў. Трэці хлопчык кінуўся дахаты і паведаміў дарослым. Яны выклікалі ратавальнікаў.
Канстанцін Іваноў, намеснік начальніка Магілёўскага абласнога ўпраўлення МНС Беларусі: "Пасля прыбыцця да месца выкліка было ўстаноўлена, што адбылося абвальванне жалезабетоннай пліты перакрыцця ў не эксплуатаваным будынку. У выніку чаго змешчаныя ў будынку двое хлопчыкаў апынуліся заціснутымі пад плітой. Працаўнікамі МНС з выкарыстаннем гідраўлічнага аварыйна-выратавальнага абсталявання яны былі вынятыя".
10-гадовы хлопчык загінуў на месцы. Другое дзіця везлі з месца здарэння ў стане клінічнай смерці. Урачы пачалі рэанімацыю ў аўтамабілі хуткай дапамогі. Ужо ў прыёмным аддзяленні абласной дзіцячай бальніцы атрымалася аднавіць сардэчную дзейнасць. Урачы працягваюць ратаваць жыццё дзіцяці.
Ігар Каско, галоўны ўрач Магілёўскай абласной дзіцячай бальніцы: "Дзіця мае цяжкую шкілетную траўму - пашкоджанні як каркаса касцявога, так і ўнутраных органаў. Стан вельмі цяжкі. Дзіця на штучнай вентыляцыі лёгкіх. Робіцца ўсё неабходнае па тэрапіі гэтага выпадку".
На месцы здарэння працягвае працаваць следча-аператыўная група. МНС, крыміналістычная лабараторыя і судмедэксперты.
Месца здарэння ўсяго за паўкіламетра ад новага мікрараёна. Побач лесапаркавая зона, і ўсяго за пару метраў ад дарогі, вядучай да прыватнага сектара.
Што рабілі дзеці на закінутай будоўлі, яшчэ трэба высветліць следству, як і ўстанавіць яе ўладальніка. Узбуджана крымінальная справа.
Андрэй Ліс, начальнік УСК Беларусі па Магілёўскай вобласці: "Па факце прычынення смерці па неасцярожнасці адной асобе. За такія дзеянні максімальна магчымае пакаранне на тэрмін да трох гадоў. Мы праводзім дзеянні па ўстанаўленні ўласніка".
Да следчай групы далучыўся і эксперт-будаўнік, які дапаможа ўстанавіць прычыну абвальвання будынка. З бацькамі школьнікаў зараз працуюць псіхолагі. Вядома, што хлопчыкі вучыліся ў 45-ай школе Магілёва.
