Сёння ўвесь свет сочыць за лёсам Паўднёвай Азіі. Рэгіён скаланула наймацнейшае за апошнія гады землетрасенне. Мінімум 350 чалавек загінулі. Магнітуда штуршкоў склала сем з паловай. У Афганістане, Індыі і Пакістане разгорнутыя пошукава-выратавальныя работы. Бліжэй за ўсіх да эпіцэнтра падземных штуршкоў аказаўся афганскі горад Файзабад. Ачаг землетрасення знаходзіўся на глыбіні 200 кіламетраў. Як гавораць навукоўцы, калі б землетрасенне адбылося крыху бліжэй да паверхні зямлі, Афганістан не пазбегнуў бы больш маштабных разбурэнняў.
Расказвае Аляксандра Пінчук. Эпіцэнтр землетрасення знаходзіўся ў раёне грады Гіндукуш - на мяжы паміж Пакістанам і Афганістанам. Сотні жыхароў усіх закранутых землетрасеннем краін пацярпелі. Штуршкі ад землетрасення адчувалі і жыхары цэнтральнаазіяцкіх краін. Водгаласы адчулі нават у Новасібірску.
Прэзідэнт Афганістана Ашраф Гані выказаў спачуванні сем'ям загінуўшых. Ён паабяцаў аператыўна забяспечыць медыцынскай і сацыяльнай дапамогай усіх, хто мае ў гэтым патрэбу.
Землетрасенне стала адным з самых магутных за апошнія гады. Яго ачаг знаходзіўся на глыбіні 212 з паловай кіламетраў і за 45 кіламетраў на паўднёвы захад ад горада Жарм. Падземныя штуршкі адчуваліся ў Таджыкістане, Кіргізіі, Бангладэш, Азербайджане і Казахстане.
З Пакістана большая частка паведамленняў пра тых, хто загінуў, прыходзіць сёння з паўночных раёнаў краіны. Як вядома, сярод загінуўшых ёсць дзеці. У панядзелак у сталіцах Індыі, Пакістана і Афганістана была праведзеная эвакуацыя. Урадам усіх закранутых землетрасеннем краін даручана правесці экстранную ацэнку ўрону. Як вядома, 10 гадоў таму магутнае землетрасенне на поўначы Пакістана забрала жыцці больш як 18-ці тысяч грамадзян краіны.