ЮНІСЕФ хвалюецца за лёс дзяцей, якім не паспелі зрабіць прышчэпкі

ЮНІСЕФ папярэджвае: пераарыентацыя ў шэрагу краін нацыянальнай сістэмы аховы здароўя на барацьбу з COVID-19 пагражае трагедыяй. Арганізацыя асцерагаецца, што да канца гэтага года могуць загінуць больш за 50 000 дзяцей, якім не паспелі зрабіць прышчэпкі. У дадатак у шэрагу дзяржаў планеты проста не хапае бальнічных ложкаў і лекаў. "Пакуль каранавірус застаецца прыярытэтам, дзеці застаюцца безабароннымі", - зважае ЮНІСЕФ.

Тэд Чайбан, рэгіянальны дырэктар ЮНІСЕФ: "Мы атрымалі ад Універсітэта Джона Хопкінса даклад з ацэнкай глабальнага ўплыву каранавіруса на сітуацыю з доступам да базавай медыцынскай дапамогі. На Блізкім Усходзе і ў Паўночнай Афрыцы ўскладнены доступ да базавай меддапамогі забярэ нямала дзіцячых жыццяў. Паводле мінімальных ацэнак, памруць 11 000 дзяцей ва ўзросце да 5 гадоў, паводле песімістычных - 51 000 дзяцей. Самай складанай будзе сітуацыя ў Емене, Судане, Джыбуці. Але закране гэтая праблема ўвесь рэгіён у цэлым".

Паводле звестак Дзіцячага фонду ААН, у рэгіёне, які знаходзіцца ў небяспецы, пражывае 41 мільён дзяцей маладзейшых за пяць гадоў. ЮНІСЕФ заклікае ўлады дзесяці краін Блізкага Усходу і Паўночнай Афрыкі больш увагі надаваць вакцынацыі і лячэнню дзіцячых хвароб. У першай палове года такія дзяржавы, як Емен і Судан, сур'ёзна пацярпелі ад засухі і нашэсця саранчы, што толькі пагаршае гуманітарную катастрофу.