Экс-прэзідэнт Украіны Віктар Януковіч прапанаваў стварыць спецкамісію па расследаванні расстрэлаў на Майдане Незалежнасці ў лютым 2014. У інтэрв'ю расійскаму агенцтву ТАСС палітык заявіў аб сваёй недатычнасці да трагедыі трохгадовай даўнасці і абвінаваціў у арганізацыі забойстваў лідараў Майдана. Таксама былы прэзідэнт прапанаваў правесці ва Украіне рэферэндум аб статусе Данбаса.
Сваё бачанне падзей Еўрамайдана Януковіч выказаў у лісце, які быў адпраўлены сусветным лідарам, уключаючы канцлера ФРГ, прэзідэнтаў Францыі і ЗША. Нагадаем, Віктар Януковіч уцёк з Кіева ў пачатку 2014. На радзіме ў дачыненні да яго ўзбуджаны крымінальныя справы па артыкулах "Дзяржздрада", "Прысваенне і растрата маёмасці", а таксама "Замах на тэрытарыяльную цэласнасць краіны".
