У Афганістане адбылася змена ўлады - Кабул перайшоў пад кантроль руху "Талібан"

Савет Бяспекі ААН сёння збярэцца на экстраннае пасяджэнне па сітуацыі ў Афганістане. Генеральны сакратар арганізацыі заклікаў "Талібан" праяўляць максімальную стрыманасць і не дапусціць гвалту. У  гэтай краіне адбылася змена ўлады. Прэзідэнт Ашраф Гані пакінуў пасаду, каб пазбегнуць кровапраліцця, і  паляцеў у Таджыкістан. Кабул перайшоў пад кантроль руху "Талібан", і сотні людзей імкнуцца пакінуць горад. На вуліцах чуваць страляніна і выбухі. Талібы захапілі тэлебачанне, занялі ўсе дзяржустановы і прэзідэнцкі палац. На
тэрыторыі Афганістана масава закрываюцца пасольствы.

Горшы правал ЗША за апошнія дзесяцігоддзі

Палітычныя апаненты прэзідэнта ЗША ўжо назвалі тое, што адбываецца ў Кабуле, горшым правалам Штатаў за апошнія дзесяцігоддзі. Сітуацыя ў Афганістане рэзка абвастрылася пасля рашэння Байдэна вывесці амерыканскі кантынгент, які знаходзіўся там 20 гадоў. Лідары руху "Талібан" ужо прыходзілі да ўлады ў Афганістане, і тады пасля захопу Кабула забаранілі ў краіне камп'ютары, музыку, тэлебачанне, алкаголь і адукацыю для жанчын.

У падтрымку краіны сотні прадстаўнікоў афганскай дыяспары ў ЗША наладжваюць спантаныя акцыі пратэсту. Дэманстранты перад будынкам штаб-кватэры ААН у Нью-Ёрку выкрыкваюць лозунгі "Жыцці афганцаў важныя" і "Спыніце забіваць афганцаў". Тыя, хто пратэстуюць за мір у Афганістане, сабраліся і ля сцен Белага дома. Яны патрабуюць спыніць гвалт, выратаваць афганскіх жанчын і пакараць "адказных".

МЗС Беларусі сочыць за сітуацыяй у Афганістане

За сітуацыяй у Афганістане сочыць МЗС Беларусі. Як заявіў прэс-сакратар ведамства Анатоль Глаз, нашы грамадзяне ў гэтай краіне могуць звяртацца па дапамогу ў пасольства Беларусі на тэрыторыі Таджыкістана.