Сёння апублікаваныя вынікі расследавання прычын крушэння малайзійскага "Боінга", які пацярпеў крушэнне ў небе над Украінай летам 2014-га. Лайнер быў збіты ракетай, выпушчанай з зенітна-ракетнага комплексу "Бук". Такая выснова змяшчаецца ў дакладзе Савета бяспекі Нідэрландаў. Праца над дакументам вялася больш за год. Экспертам атрымалася ўстанавіць, што ракета ўзарвалася з левага боку кабіны пілота. Паветранае судна было прабітае мноствам асколкаў і разбурылася ў паветры. Усе пасажыры і члены экіпажа загінулі практычна імгненна. Адзначым, галандскія эксперты не ставілі перад сабою задачу назваць канкрэтных вінаватых трагедыі.
Тйіб Ёстра, кіраўнік Савета бяспекі Нідэрландаў: "Рызыкі, звязаныя з грамадзянскай авіяцыяй, не былі належным чынам вызначаныя. Ні Украінай, ні аператарамі палётаў, ні іншымі дзяржавамі і міжнароднымі арганізацыямі. Наша даследаванне паказала, што ўсе бакі разглядалі канфлікт ва ўсходняй частцы Украіны з ваеннага пункта гледжання. Але ніхто не задумваўся аб магчымай пагрозе для грамадзянскай авіяцыі".
І сёння свае даклады аб крушэнні рэйса MH-17 апублікавалі расійскі канцэрн "Алмаз-Антэй" - ён вырабляе ракеты для ЗРК "Бук" - і спецкамісія пры ўкраінскім урадзе. І расійскія, і ўкраінскія эксперты сыходзяцца ў меркаванні, што лайнер быў збіты ракетай. Адназначнага адказу на самае галоўнае пытанне - адкуль менавіта страляў "Бук" - у спецыялістаў няма. Украінскія эксперты сцвярджаюць, што ракета была выпушчаная з тэрыторыі, падкантрольнай фарміраванням ДНР. Расійскія аналітыкі, наадварот, лічаць, што "Бук" знаходзіўся ў раёне, які займалі ўкраінскія ваенныя. Нагадаем, трагедыя, якая адбылася 17 ліпеня мінулага года, панесла 298 жыццяў.
