Ён падарваў сябе на Manchester Arena пасля канцэрта амерыканскай спявачкі Арыяны Грандэ. Тэракт стаў найбуйнейшым у Каралеўстве за апошнія 12 гадоў. Загінулі 22 чалавекі (сярод іх - 12 дзяцей да 16-ці гадоў), каля 120-ці - пацярпелі. Шматлікія дагэтуль лічацца прапаўшымі без весткі. Інфармацыі аб беларусах сярод пацярпелых падчас тэракта ў Манчэстэры няма. Аб гэтым паведамілі ў МЗС нашай краіны. Прэзідэнт Беларусі Аляксандр Лукашэнка выказаў глыбокія спачуванні каралеве Вялікабрытаніі, родным і блізкім загінуўшых і пацярпелых. Паліцыя Манчэстэра праводзіць расследаванне. Праваахоўнікі папрасілі відавочцаў прысылаць усе відэазапісы. Меры бяспекі павышаныя па ўсёй Вялікабрытаніі. Падрабязнасці крывавай трагедыі - у Юрыя Казлова.
Выбух на стадыёне Manchester Arena прагрымеў у палове першай ночы па мінскім часе. У момант трагедыі на крытай пляцоўцы праходзіў канцэрт амерыканскай спявачкі Арыяны Грандэ. Яна вельмі папулярная сярод моладзі, таму сярод загінуўшых і параненых шмат дзяцей і падлеткаў.
Шарлота Пайндэр, відавочца: "Мы яшчэ былі ў зале, калі раздаўся ўзрыў. Я адразу пабегла да выхаду. Памятаю, каб супакоіць людзей, гаварылі, што гэта хлапкі паветраных шароў".
Усе сарваліся са сваіх месцаў, людзі крычалі і плакалі. Мы ж проста здранцвелі. Перш чым кудысьці бегчы, мы спрабавалі поглядам знайсці дзверы, да якіх можна было прабрацца.
Начыненая цвікамі самаробная бомба здэтанавала адразу пасля завяршэння шоу. Выбуховае прыстасаванне было закладзена ў крытым пераходзе, які злучае стадыён з галоўнай чыгуначнай станцыяй Манчэстэра - менавіта па гэтым калідоры людзі вярталіся з канцэрта. Нягледзячы на намаганні супрацоўнікаў Manchester Arena, пасля выбуху ўзнікла паніка - тысячы людзей кінуліся да выхадаў. На шчасце, ахвяраў падчас ціскатні атрымалася пазбегнуць.
Тэрэза Мэй, прэм'ер-міністр Вялікабрытаніі: "Я толькі што старшынствавала на пасяджэнні крызіснага камітэта "Кобра", дзе мы абмяркоўвалі дэталі гэтай ашаламляльнай падзеі. Нашы думкі і малітвы разам з сем'ямі загінуўшых. Гэта горшае, што адбывалася ў Манчэстэры і наогул на поўначы Англіі. Месца атакі было выбрана наўмысна - поп-канцэрт, на які прыйшло шмат падлеткаў".
На будынку рэзідэнцыі брытанскага прэм'ера на Даўнінг-стрыт прыспушчаны дзяржаўны флаг, у Вене з хвіліны маўчання ў памяць аб загінуўшых стартавала канферэнцыя АБСЕ па процідзеянні тэрарызму. Па ўсім свеце да пасольстваў Злучанага Каралеўства нясуць кветкі і свечкі...
Адказнасць за выбух на Manchester Arena ўзяла на сябе групоўка "Ісламская дзяржава" - радыкалы пацвердзілі сваё дачыненне да атакі ў спецыяльным відэазвароце. Паводле папярэдніх звестак, тэракт учыніў смяротнік - аднак самі ісламісты гэтую інфармацыю не пацвярджаюць. Таксама паліцыі атрымалася затрымаць 23-гадовага мужчыну, якога падазраюць у дачыненні да арганізацыі нападу. У дадатак следству трэба будзе высветліць, чаму не спрацавалі меры бяспекі, павышаныя ў краіне, ды і ва ўсёй Еўропе яшчэ ў 2015-м. Паліцыя ўсяго Старога Свету прыведзеная ў стан павышанай гатоўнасці. Меры бяспекі ўзмацняе і УЕФА - у тым ліку, на час заўтрашняга матча фіналу Лігі Еўропы, у якім сыдуцца "Манчэстэр Юнайтэд" і галандскі "Аякс".
