Не стала ўладара чорных дзюр. На 77-м годзе жыцця памёр Стывен Хокінг. Пра смерць вядомага фізіка паведамілі яго дзеці. Навуковец быў амаль цалкам паралізаваны, што не перашкаджала яму шмат гадоў весці актыўны лад жыцця. У 22 медыкі абяцалі яму не больш за тры гады жыцця, але прагнозы не апраўдаліся. Хокінг двойчы быў жанаты. Стаў бацькам траіх дзяцей і нават здолеў пабываць у бязважкасці.
У Лондане, Жэневе, Рыме і Бруселі выступленне Хокінга перад публікай заўсёды станавілася падзеяй нумар адзін. Шырокую вядомасць брытанскі фізік атрымаў пасля таго, як у красавіку 1988 года была апублікаваная яго навукова-папулярная кніга "Кароткая гісторыя часу". Пазней яна была перакладзеная на дзясяткі моў. Агульны тыраж выдання склаў больш за 10 мільёнаў экзэмпляраў. Шмат увагі навуковец надаваў і такім актуальным праблемам чалавецтва, як глабальнае пацяпленне, стан навакольнага асяроддзя і сацыяльная няроўнасць.
Стывен Хокінг у 20 гадоў скончыў Оксфард, тады ў яго і сталі выяўляцца прыкметы аміятрафічнага склерозу. Пазней яны прывялі да паралюшу.
Большую частку жыцця навуковец правёў у інвалідным крэсле. Яго завуць бацькам чорных дзюр. Таксама ён вывучаў тэорыю ўзнікнення свету. З развіццём хваробы рухомасць захавалася толькі ў мімічнай цягліцы шчакі. Насупраць яе быў замацаваны спецыяльны датчык. З яго дапамогай Хокінг кіраваў камп'ютарам, пісаў кнігі і адказваў на лісты.
Нават цалкам паралізаваны, навуковец вёў актыўнае жыццё: займаўся навукай, выступаў з дакладамі, выкладаў, размаўляў са светам з дапамогай сінтэзатара мовы.
Біяграфічны фільм пра яго - "Сусвет Стывена Хокінга" - быў намінаваны на "Оскар". Ён быў зняты паводле мемуараў першай жонкі навукоўца Джэйн Хокінг "Падарожжа да бясконцасці: маё жыццё са Стывенам". За ролю знакамітага фізіка брытанскі акцёр Эддзі Рэдмэйн атрымаў прэмію "Оскар".
Адвага і ўпартасць фізіка натхнялі людзей ва ўсім свеце. Аднойчы Хокінг сказаў, што Сусвет не значыў бы так шмат, калі б у ім не жылі людзі, якіх любіш.
