Мінск гатовы забяспечыць усе ўмовы для правядзення сустрэчы кіраўнікоў МЗС "нармандскай чацвёркі", калі ўдзельнікі перагаворнага працэсу аб такой сустрэчы дамовяцца, - паведамляе прэс-служба знешнепалітычнага ведамства Беларусі.
Сёння міністр замежных спраў Германіі Франк-Вальтэр Штайнмаер заявіў, што ён сумесна з французскім калегам Жан-Маркам Эйро прапанаваў кіраўнікам МЗС Украіны і Расіі зноў сабрацца ў беларускай сталіцы. Паводле слоў Штайнмаера, неабходнасць правесці перамовы выкліканая пагаршэннем сітуацыі на Данбасе.
Аб цяжкім становішчы на ўсходзе Украіны заявіў сёння і спецпрадстаўнік АБСЕ ў трохбаковай кантактнай групе Марцін Сайдзік.
Марцін Сайдзік, спецпрадстаўнік АБСЕ ў трохбаковай кантактнай групе: "Захоўваецца напружаная сітуацыя ўздоўж лініі судакранання, у тым ліку, назіраюцца шматлікія выпадкі парушэння існуючых дамоўленасцяў, якія датычацца, у прыватнасці, рэжыму спынення агню і адводу цяжкіх узбраенняў. Большасць грамадзянскіх і ваенных страт з'яўляюцца вынікам абстрэлаў з выкарыстаннем цяжкага ўзбраення. Гэтае ўзбраенне не павінна там знаходзіцца".