Ва Украіне прайшлі выбары ў Вярхоўную раду. Паводле звестак да гэтай хвіліны, лідарамі гонкі з'яўляюцца прапрэзідэнцкі Блок Пятра Парашэнкі і Народны фронт цяперашняга прэм'ера Арсенія Яцанюка. У іх прыкладна роўная колькасць галасоў. Менавіта гэтыя палітычныя сілы, па меркаванні экспертаў, складуць касцяк новай Рады восьмага склікання.
Нягледзячы на тое, што канчатковыя вынікі галасавання абвесцяць толькі ў сераду, ужо сёння, паводле слоў Прэзідэнта Парашэнкі, стартуюць кансультацыі па стварэнні парламенцкай кааліцыі. Расклад сіл ацаніў Андрэй Нікалаенка.
Паводле звестак ЦВК Украіны, яўка выбаршчыкаў на выбарах у Вярхоўную раду восьмага склікання склала крыху больш за 52%. Самая высокая актыўнасць выбаршчыкаў назіралася ў Цярнопальскай і Львоўскай абласцях - тут на ўчасткі прыйшлі каля 70% зарэгістраваных выбаршчыкаў. Менш актыўнымі апынуліся жыхары сталіцы - крыху больш за 55%. Найменшы ж паказчык актыўнасці прадэманстравалі жыхары Адэскай, Луганскай і Данецкай абласцей - крыху больш за 30%. Аддаць свой голас украінскія выбаршчыкі маглі на больш чым на 29,5 тысячах участках для галасавання, якія працавалі па краіне.
Паводле звестак нацыянальнага exit poll, у новы парламент Украіны праходзяць сем палітычных сіл. Гэта партыя прэзідэнта Блок Пятра Парашэнкі і Народны фронт прэм'ера Арсенія Яцанюка, якія, паводле папярэдніх звестак, набіраюць практычна аднолькавую колькасць галасоў - каля 22-23%. На трэцім месцы партыя Самадапамога мэра Львова Андрэя Садовага, крыху больш за 13%. Акрамя таго, у Вярхоўную раду праходзяць Апазіцыйны блок (былая Партыя рэгіёнаў), Радыкальная партыя Алега Ляшко, нацыяналістычная партыя Свабода на чале з Алегам Цягнібокам і партыя Юліі Цімашэнкі Бацьківшчіна.
Упершыю ў найноўшай гісторыі Украіны ў парламент не трапяць камуністы, якія не змаглі набраць неабходныя для праходжання ў Раду 5%. Усяго крыху больш за працэнт на выбарах набраў экстрэмісцкі Правы сектар. Аднак яго лідар Дзмітрый Ярош усё ж атрымае дэпутацкае крэсла, бо балатаваўся па аднамандатнай акрузе ў Днепрапятроўскай вобласці.
Адразу ж пасля галасавання са зваротам да ўкраінцаў выступіў прэзідэнт краіны Пётр Парашэнка, у якім ён падзякаваў суграмадзянам за зроблены імі выбар.
Пётр Парашэнка, прэзідэнт Украіны: Вынікі выбараў прадэманстравалі ўпэўненую перамогу дэмакратычных праеўрапейскіх, праўкраінскіх сіл. І гэта дае нам шырокія магчымасці для развіцця і забеспячэння правядзення рэформ. У нас ёсць 10 дзён на тое, каб сфарміраваць кааліцыю, і я вельмі спадзяюся на лепшы ўрад Украіны. Таму, што ніякі іншы з тымі намаганнямі, якія сёння стаяць перад краінай, не справіцца!.
Прынцыповую згоду на фарміраванне парламенцкай кааліцыі з прэзідэнцкім блокам ужо выказаў прэм'ер-міністр Арсеній Яцанюк. Паводле яго меркавання, базай для стварэння новай кааліцыі павінна стаць пагадненне аб асацыяцыі паміж Украінай і ЕС.
У цэлым па краіне галасаванне прайшло адносна спакойна, парадак на выбарчых участках забяспечвалі амаль 60 тысяч міліцыянераў. Зрэшты, без інцыдэнтаў усё ж не абышлося. Так, у Харкаве ў падвале адной са школ, дзе праводзілася галасаванне, праваахоўнікі знайшлі гранату без загваздкі. Там жа быў затрыманы мужчына, які прыйшоў на ўчастак з аўтаматам. Пад Кіевам гэтай ноччу прадстаўнікі Правага сектара заблакіравалі адну з выбарчых камісій. Яны спрабавалі перашкодзіць даставіць бюлетэні ў акруговую камісію. Аднак, як запэўнілі ў ЦВК Украіны, гэтыя выпадкі ніяк не паўплываюць на вынікі выбараў.
