Да падзей на поўдні Алжыра прыкавана зараз увага сусветных СМІ

Верталёты ВПС Алжыра нанеслі ўдар па пазіцыях паўстанцаў. Інфармацыя ўвесь дзень паступае вельмі супярэчлівая. Дагэтуль незразумела колькі менавіта чалавек знаходзіліся ў заложніках - сусветныя інфармагенцтвы называюць лічбу ад некалькіх сотняў да некалькіх тысяч чалавек. І гэта не толькі мясцовыя жыхары, але і грамадзяне ЗША, Японіі і краін ЕС. Падчас спецаперацый 600 чалавек ўдалося вызваліць. 15 баевікоў забітыя, у тым ліку лідар групоўкі. У той жа час паведамляецца аб ахвярах сярод заложнікаў - загінулі 35 чалавек. Гэтыя дадзеныя пакуль не пацверджаныя на афіцыйным узроўні. Акрамя таго, тэлеканал Cкай-Ньюз літаральна гадзіну таму паведаміў пра магутны выбух на тэрыторыі газавага комплексу. У гэты момант няма дакладнай інфармацыі пра тое, што стала яго прычынай і які лёс людзей, якія застаюцца ў заложніках. Захоп заложнікаў стаў рэакцыяй на ўдзел Францыі ў ваеннай аперацыі на поўначы Малі. У якасці патрабаванняў баевікі выстаўлялі транспарт для свабоднага праезду ў Малі, а таксама настойвалі, каб замежныя войскі былі выведзеныя з гэтай краіны. Ваенная аперацыя ў Малі стала галоўнай тэмай на пасяджэнні міністраў замежных спраў Еўрасаюза ў Брусэлі. Па выніках было вырашана накіраваць на дапамогу французам у гарачы пункт еўрапейскі ваенны кантынгент - да 500 чалавек. Мэта - падрыхтоўка мясцовых узброеных сіл. Місія ў Малі разлічаная на 15 месяцаў. Бюджэт - 12 мільёнаў 300 тысяч еўра. На працягу 10-ці дзён у краіне разгорнуць і ваенны кантынгент краіны Эканамічнай супольнасці краін Заходняй Афрыкі. А ў суботу ў найбуйнейшым горадзе Кот-д'Івуара - Абіджане - ЭКАВАС збяруцца на надзвычайны саміт для абмеркавання сітуацыі ў Малі. Мясцовыя вайскоўцы пры падтрымцы французскіх праводзяць аперацыі супраць баевікоў, якія захапілі поўнач краіны.