Сустрэча ў Парыжы - першае асабістае знаёмства Пуціна з Зяленскім, якія да ўчарашняга дня мелі зносіны толькі па тэлефоне, а таксама першы саміт у "нармандскім фармаце" з 2016 года.
Шляхам прамога дыялогу бакі шукалі шляхі пераадолення прынцыповых рознагалоссяў. Галоўная задача - да канца года ўсталяваць паўнавартаснае перамір'е на Данбасе. Ахвярамі канфлікту за 6 гадоў сталі 13 тысяч чалавек.
Прэзідэнт Украіны Уладзімір Зяленскі ацаніў вынік саміту як нічыю.
Уладзімір Зяленскі, Прэзідэнт Украіны: "Я ехаў сюды дамовіцца аб абмене палоннымі "ўсіх на ўсіх". Гэта прадугледжана мінскімі пагадненнямі, але зараз мы абгаварылі тэрміны, пэўную дату. Мы спыніліся на 24 снежня. Апошні дзень гэтага месяца - крайняя дата. Я веру, што ўсё будзе выканана да канца года".
Прэзідэнт Расіі Уладзімір Пуцін паглядзеў на сітуацыю глыбей.
Уладзімір Пуцін, Прэзідэнт Расіі: "Неабходна сінхранізаваць працэс дасягнення перамір'я з правядзеннем ва Украіне палітычных рэформ, якія прадугледжаныя мінскімі пагадненнямі. Па-першае, унясенне змен у Канстытуцыю, якія замацоўваюць асаблівы статус Данбаса на пастаяннай аснове. Неабходна падоўжыць пагадненне аб асаблівым статусе асобных рэгіёнаў Данбаса і надаць гэтай норме пастаянны характар, як гэта паказана ў мінскіх пагадненнях".Абмен палоннымі закране прыкладна тры сотні чалавек. Гэта тэма стане асноўнай ў пасяджэннях трохбаковай кантактнай групы ў Мінску на наступным тыдні.
Арганізацыя мерапрыемства на фоне ўсеагульнай забастоўкі, якая працягваецца ў Францыі шосты дзень, пакідала жадаць лепшага. Журналістам доўга не выдавалі акрэдытацыі і рабілі гэта ў трох розных месцах. Каля сотні журналістаў не паспелі трапіць у двор палаца да прыезду прэзідэнтаў. Іх адагналі ад варот, і яны здагадваліся, што хтосьці прыехаў толькі па гуках марша і па картэжах кіраўнікоў дзяржаў. Wi-Fi лёг адразу. А выніковая прэс-канферэнцыя перакладалася на чатыры мовы краін - удзельніц саміту, але не на англійскую.
Як звычайна сустрэча прыцягнула ўвагу розных рухаў. Феміністкі сустрэлі Пуціна ў сталіцы Францыі акцыяй пратэсту.
Усе без выключэння ўдзельніцы акцыі былі затрыманыя паліцэйскімі.
У самім Кіеве за дзень да перамоў у Парыжы на Майдане сабраліся тысячы чалавек і правялі акцыю пратэсту пад лозунгам "Няма капітуляцыі!".
Наступны саміт "нармандскай чацвёркі" адбудзецца праз чатыры месяцы. Аб гэтым заявіў французскі прэзідэнт Эмануэль Макрон. Сустрэча на высокім узроўні можа прайсці ў Берліне.
