Генеральны сакратар ААН Пан Гі Мун мае намер абмеркаваць сірыйскае пытанне на саміце Вялікай дваццаткі, які адкрываецца заўтра ў Санкт-Пецярбургу. Пан Гі Мун падкрэсліў, што нестабільнасць у Сірыі і ва ўсім рэгіёне не служаць на карысць нічыім інтарэсам і заклікаў засяродзіцца на пошуку мірнага рашэння канфлікту, чарговы раз пазначыўшы пазіцыю арганізацыі.
У ЗША, паміж тым, актыўна абмяркоўваюць сцэнарый ваеннай аперацыі ў Сірыі, які напярэдадні адобрылі члены камітэта па замежных справах амерыканскага сената. Абмеркаванне, праўда, было перарвана пацыфістамі. У зале з'явіліся плакаты Амерыканцы, скажыце не вайне ў Сірыі!. Паводле праекта рэзалюцыі, на ваенную аперацыю будзе адведзена 60 дзён з магчымасцю падаўжэння яшчэ на месяц. Галасаванне ў кангрэсе павінна адбыцца 9 верасня, калі заканадаўцы вернуцца з канікулаў.
Тым часам у Сірыю ўжо пачалі таемна пранікаць баявыя падраздзяленні, падрыхтаваныя амерыканскімі спецслужбамі - аб гэтым паведамляе газета New York Times.
Падобныя навіны выклікалі ўсплёск абурэння сярод простых амерыканцаў, бо супраць ваеннай аперацыі ў Сірыі выступаюць ужо 56% грамадзян ЗША, і лічбы гэтыя імкліва растуць.
У сувязі з абвастрэннем сітуацыі ў Сірыі і вакол яе МЗС нашай краіны настойліва рэкамендуе беларускім грамадзянам пакінуць тэрыторыю Сірыі. Па дапамогу можна звяртацца ў пасольства Беларусі ў арабскай рэспубліцы або ў офіс ганаровага консула Беларусі ў Бейруце.
