Расказвае Лізавета Казакова.
Эдвард Сноўдэн за апошнія дні стаў адной з самых абмяркоўваемых персон, дакладней, яго рэзанансны ўчынак. Былы тэхнічны спецыяліст ЦРУ і да нядаўняга часу супрацоўнік кансалтынгавай фірмы, у ліку кліентаў якой Агенцтва нацыянальнай бяспекі ЗША, зліў журналістам інфармацыю аб сочцы амерыканскіх спецслужбаў за карыстальнікамі сацыяльных сетак і камп'ютэрных сістэм. Сёння ён абяцае ўразіць свет новымі адкрыццямі.
Ведаючы гісторыю радавога Мэнінга, які перадаў WikiLeaks дакументы перапіскі Дзяржаўнага дэпартамента, зразумела, што можа пагражаць парушальніку дзяржбяспекі ЗША Сноўдэну, калі б ён трапіў у рукі ФБР. Напярэдадні ініцыятар скандалу бясследна знік з гатэля ў Ганконгу. З вуснаў прадстаўнікоў улад ЗША на ўсю моц гучаць заклікі дабівацца экстрадыцыі Сноўдэна і пакараць яго згодна з амерыканскімі законамі. Аж да смяротнага пакарання, ад якога вось ужо год хаваецца адзін з галоўных інфармацыйных ворагаў Вашынгтона.
Джуліян Асанж, заснавальнік сайта WikiLeaks: Эдвард Сноўдэн - гэта герой, які інфармаваў грамадскасць пра адну з самых сур'ёзных падзей гэтага дзесяцігоддзя - паўзучага стварэння сістэмы ўсеагульнай сочкі. Гэтая сістэма аказала заганны ўплыў на суды ў ЗША, зрабіўшы іх тайнымі і прымусіўшы іх выносіць рашэнні, якія парушаюць канстытуцыйныя гарантыі для амаль усяго насельніцтва.
Як высвятляецца, не толькі амерыканскага. Трымаць адказ перад дэпутатамі брытанскага парламента прыйшлося кіраўніку МЗС Вялікабрытаніі. Дэпутаты абвінавачваюць улады ў незаконным зборы даных інтэрнэт-карыстальнікаў каралеўства і перадачы іх амерыканцам. Гарачая дыскусія разгарэлася і ў Еўрапарламенце. Там абураны электроннай сочкай за еўрапейцамі, у тым ліку і самімі еўрадэпутатамі.
Тоніа Борг, еўракамісар: Мы патрабуем выразных абавязальніцтваў з боку ЗША адносна павагі асноўных правоў грамадзян ЕС. Мы просім тлумачэнняў, ці абмяжоўваецца доступ да анкетных звестак асобнымі выпадкамі, або ідзе аптовая перадача даных.
Афіцыйны Вашынгтон пакуль маўчыць, задача - не выпусціць Сноўдэна і прыструніць прэсу. Калі ЗША парпосяць у Ганконга экстрадыцыі праследуемага, улады Кітая могуць заблакіраваць рашэнне. Дарэчы, Асандж заклікаў краіны свету прадаставіць Сноўдэну прытулак. Да прыкладу, Расія яго зварот разгледзіць, калі такі будзе, паведаміў прэс-сакратар прэзідэнта Дзмітрый Пяскоў, без умоўнага ладу.
Кіраўнік камітэта Дзярждумы па міжнародных справах Аляксей Пушкоў зазначыў: Калі Расія прадаставіць прытулак Сноўдэну, у ЗША будзе істэрыка.
