Сёння, у дзень чатырох адзінак, у Кітаі пачаўся сапраўдны гандлёвы фестываль. Віртуальныя супермаркеты знізілі цэны аж да 90%. У выніку колькасць кліентаў інтэрнэт-магазінаў павялічылася ў сотні разоў.
За гандлёвай гонкай у Паднябеснай назіраў і наш карэспандэнт Дзяніс Бальшакоў.
З пасылкамі наперавес ён імчыцца на сваім мапедзе да інтэрнэт-пакупнікоў. Кур'ер Дай Хайтаа з 9 раніцы дастаўляе заказы. Апошнім часам працы для яго прыкметна дадалося.
Дай Хайтаа, кур'ер: Колькасць пасылак павялічваецца з кожным днём. Раней я дастаўляў максімум па 120 каробак за дзень, а зараз ужо па 140. Анлайн-магазіны пачынаюць рабіць скідкі. І пакупнікі замест аднаго тавара, робяць па 4-5 заказаў.
Сёння кур'еру пашанцавала. Усе пакупнікі былі на месцы, у выніку ўдалося сэканоміць 15 хвілін, якія Дай Хайтаа траціць на абед.
Дай Хайтаа, кур'ер: У дзень чатырох адзінак і яшчэ на працягу тыдня пасля яго пра абед мне можна будзе зусім забыць. Часу не будзе.
Лю Шаадун працуе кладаўшчыком ужо больш за дзесяць гадоў. Гаворыць, што ў дзень вялікіх распрадаж з-за наплыву заказаў нават кіраўніцтва кампаніі выйдзе на сартаванне тавараў.
У кампаніі Шэньтун працуюць 150 тысяч супрацоўнікаў. Летась 11 лістапада лагістычная фірма развезла па ўсёй краіне 78 мільёнаў пасылак. У дзень чатырох адзінак канкурэнцыя паміж прадаўцамі абвастраецца, але гэта на руку пакупнікам. Больш за 20 тысяч магазінаў далі скідкі ад 50%. Найбуйнейшая ў Шанхаі гандлёвая інтэрнэт-кампанія Іхаадзянь, саўладальнік сеткі магазінаў Уол-Март, 11 лістапада здзіўляе сваіх кліентаў спецыяльнай прапановай - распрадажай загранічных прадуктаў.
Хуан Чжысюн, віцэ-прэзідэнт кампаніі YHD.COM: Імпартныя прадукты харчавання і іншыя замежныя тавары - важны сегмент для нас. Да дня чатырох адзінак мы сёлета рыхтуемся дбайна. Пашыраем склады, праводзім інструктаж персанала. Давялося ўкласці немалыя сумы для акцыі. Але, думаю, усё акупіцца.
Летась у дзень чатырох адзінак партал Алібаба зарабіў 3 мільярды долараў. Дабіцца такіх вынікаў удалося шмат у чым дзякуючы маштабнай лагістычнай сетцы. На яе кампанія выдаткавала больш за 15 мільярдаў. У найбліжэйшы час партал мае намер дастаўляць заказы кліентам унутры краіны кругласутачна. Сёлета буйныя гульцы лагістычнага рынку ўжо падрыхтавалі больш за сто самалётаў для аператыўнай дастаўкі тавара ў суседнія рэгіёны.
Днём грандыёзных анлайн-распрадаж у Кітаі 11 лістапада стаў 5 гадоў таму. Раней гэта было свята адзінокіх людзей - супрацьлегласць Дню святога Валянціна. Інтэрнэт-магазіны сталі прасоўваць гэтую дату як фестываль гандлю, які пасля стаў самым загружаным днём у годзе для прадаўцоў, кур'ераў і аматараў шопінгу. Аналітыкі гавораць, што ў сёлетні дзень адзінак колькасць наведвальнікаў кітайскіх інтэрнэт-магазінаў перавысіла ўсё насельніцтва Бразіліі.
