Гэтымі днямі за выступленнямі нашых спартсменаў на Алімпіядзе ў прамым эфіры тэлеканалаў галоўнага медыяхолдынга краіны пільна сочаць і горача падтрымліваюць сотні тысяч беларусаў. Сёння ў Раўбічах спецыяльна для гледачоў на гадзіну перапынілі Кубак Беларускай федэрацыі біятлона і завялі на вялікі экран трансляцыю з Пхёнчхана. Увесь стадыён з заміраннем сэрца сачыў за гонкай на Алімпіядзе. Разам з тытулаванымі спартсменамі хваляваліся і перажывалі за нашых біятланістак і карэспандэнты Агенцтва тэленавін.
Расказвае Крысціна Камыш: 10 гадзін раніцы. Мека беларускага біятлона - Раўбічы. Стадыён рыхтуецца да фіналу Кубка Беларускай федэрацыі біятлона. На стрэльбішчы здымачная група Агенцтва тэленавін сустракае чатырохразовага алімпійскага чэмпіёна Аляксандра Ціханава.
У такім парыве за нашых алімпійцаў зараз б'юцца сэрцы ўсіх беларусаў. Напярэдадні - за пераможніцу ў фрыстайле Ганну Гуськову. Сёння - за Дар'ю Домрачаву, Надзею Скардзіну і Ірыну Крыўко.
14:00. Спецыяльна для гледача спаборніцтва перапынілі на гадзіну, завялі на вялікі экран трансляцыю з Пхёнчхана. Увесь стадыён застыў у чаканні.
Дар'я Домрачава паказвае добры ход на лыжні, яна дакладная на лежні, адзін промах на першай стойцы. А вось другая - чыста. Біятланісткі яшчэ не фінішавалі, але ўжо тады шматразовыя прызёры чэмпіянатаў свету Вольга Назарава і Алена Зубрылава ведалі, што Беларусь сёння будзе на п'едэстале.
І вось яны, апошнія метры дыстанцыі. Як толькі Дар'я перасякае фінішную лінію, стадыён узрываецца авацыямі.
#Разамзкамандай - не проста хештэг у сацыяльных сетках. Бо калі перажываць, то толькі разам. Больш за 2 тысячы чалавек на стадыёне ў Раўбічах сачылі за прамой трансляцыяй алімпійскага мас-старту. Падтрымлівалі нашых спартсменак і шчыра радаваліся серабру Дар'і Домрачавай.
Тут жа зноў сустракаем Аляксандра Ціханава. Пакуль адны спартсмены змагаюцца за медалі на зімовай Алімпіядзе ў Паўднёвай Карэі, да сваіх спаборніцтваў у Пхёнчхане дэталёва рыхтуюцца паралімпійцы. Але дзеля мас-старту трэніроўкі былі спыненыя.
Сталічная моладзь таксама хварэе за нашых алімпійцаў. У гандлёвым цэнтры сёння прайшоў флэшмоб. Пажаданні і віншаванні Ганне Гуськовай і Дар'і Домрачавай можна было пакінуць на фотабанеры. Прывітанні прыляталі з Віцебска, Магілёва, Пінска, Масквы.
Фотабанер, дарэчы, абяцалі перадаць спартсменкам адразу пасля прылёту. А нашы піянеры ў знак падтрымкі ўжо адправілі ў сталіцу Алімпійскіх гульняў пасылкі з падарункамі. Туды яны ўклалі свае лісты, у якіх павіншавалі Ганну Гуськову і Дар'ю Домрачаву з перамогамі, а таксама запіскі з пажаданнямі ўсёй зборнай здароўя і новых медалёў у скарбонку. У Пхёнчхан адправілі і цацкі, зробленыя сваімі рукамі.
І зараз у сацыяльных сетках ляцяць Дар'і віншаванні. Нацыянальны алімпійскі камітэт, хакейны клуб "Дынама", футбольны БАТЭ, спартсмены, журналісты, балельшчыкі - усе святкуюць перамогу.
