Увага беларускіх балельшчыкаў сёння будзе прыкавана да біятлоннага стадыёна "Альпенсія" ў алімпійскім Пхёнчхане. Тут пройдзе змяшаная эстафета. Беларусь прадставяць Надзея Скардзіна, Дар'я Домрачава, Сяргей Бачарнікаў і Уладзімір Чапелін. У 14:10 па мінскім часе гонку ў прамым эфіры пакажа "Беларусь 5". З падрабязнасцямі - наш карэспандэнт Ганна Эйсмант.
11-ы спаборніцкі дзень на зімовай Алімпіядзе ў Пхёнчхане пройдзе для нас пад знакам біятлона - на сёння прызначаная змяшаная эстафета. І перад гонкай каментарый даў старшы трэнер зборнай Беларусі Юрый Альберс.
На біятлонны стадыён "Альпенсія" выйдзе наймацнейшы склад зборнай Беларусі.
Гэта будзе ўжо 9-я гонка - па чатыры правялі мужчыны і жанчыны. Зразумела, што назапасілася і фізічная, і псіхалагічная стомленасць, бо біятлонныя спаборніцтвы ў Пхёнчхане - адны з самых працяглых у алімпійскай праграме. Мы спыталі, можа быць, трэнерскі штаб хацеў бы даць адпачыць сярэбранаму прызёру Дар'і Домрачавай, аднак Юрый Юр'евіч засведчыў, што Дар'я сама вырашыла, што абавязкова пабяжыць эстафету.
У нашых біятланістаў у Пхёнчхане пакуль слабое звяно - стральба, і менавіта на гэта звяртаюць асноўную ўвагу на трэніроўках.
Гонка абяцае стаць вельмі відовішчнай. Вядомы расійскі каментатар Дзмітрый Губерніеў лічыць, што тон у змяшанай эстафеце зададуць менавіта жанчыны.
А ўчора ў спаборніцтвах канькабежцаў наш Ігнат Галавацюк фінішаваў 22-м на дыстанцыі 500 метраў. Зазначым, гэта не яго профільная дысцыпліна, асноўную
стаўку Ігнат робіць на дыстанцыю тысяча метраў, фінал прызначаны на 23 лютага.
