У гэтыя дні Заслаўе прымае чэмпіянат свету па веславанні на байдарках і каноэ сярод моладзі і юніёраў. У Беларусь прыбываюць дэлегацыі з 60 краін. І першая сенсацыя здарылася ўжо ў аэрапорце. Напярэдадні Дзяржаўны мытны камітэт краіны выявіў у багажы з Францыі забароненае рэчыва, прасцей гаворачы - допінг. Што менавіта гэта за субстанцыя і хто ж спрабаваў яе правезці - у Нацыянальным антыдопінгавым агенцтве нам не паведамілі. Але па гутарцы стала зразумела, што гаворка ідзе аб нейкай спартсменцы.
Валерый Ракавец, намеснік дырэктара Нацыянальнага антыдопінгавага агенцтва Беларусі: "Субстанцыя была выяўленая падчас надгляду асабістага багажу спартсменаў, якія прыбываюць на чэмпіянат свету па веславанні на байдарках і каноэ сярод моладзі і юніёраў, у асабістым багажы. Мы паінфармавалі міжнародную федэрацыю і Сусветнае антыдопінгавае агенцтва. Яны маюць права прыняць рашэнне ўжо, можа быць, па больш дбайным стаўленні да допінг-кантролю альбо да французскай дэлегацыі, альбо да гэтага спартсмена. Спаборніцкі перыяд для гэтай спартсменкі яшчэ не наступіў. Я не магу ніякай канкрэтыкі, на жаль, дадаць. Гэта будзе з майго боку некарэктна і супярэчыць патрабаванню кодэкса аб максімальна магчымай у канфедыцыйнасці".
Падобная гісторыя зусім нядаўна каштавала гадавой дыскваліфікацыі ўсёй беларускай зборнай па байдарках і каноэ. Нагадаем, у красавіку на зборах у Францыі парыжскае антыдопінгавае агенцтва разам з прадстаўнікамі сілавых структур учынілі спецаперацыю ў размяшчэнні нашай каманды. І знайшлі 16 таблетак мельдонія нават не ў весляроў, а ў трэнера жаночай каманды. Пры гэтым у спецыяліста быў адпаведны рэцэпт. Як павядзе сябе міжнародная федэрацыя ў падобнай сітуацыі, але ўжо з французскімі атлетамі, пакажа час.
