Таварыскі хакейны матч прэзідэнтаў Беларусі і Расіі адбыўся на "Стрэльна Арэне"

Гарачы лёд на хакейнай "Стрэльна Арэне". Матч таварыскі, але спартыўны азарт ніхто не адмяняў. Дарэчы, прэзідэнты (Лукашэнка пад нумарам 1, Пуцін - 11) згулялі ў адной камандзе і вызначыліся шайбамі. 

Кампанія ў прэзідэнтаў - мара аматара хакея. Фяцісаў, Фёдараў, Кавальчук - тыя, хто замацаваў за зборнай СССР, а затым і расійскай дружынай мянушку Чырвоная машына. Дарэчы, умоўна як раз і падзяліліся: каманды чырвоных і белых. Прэзідэнты ў белым. 

На лёдзе і не менш знакамітыя Валерый Каменскі і Аляксей Касатонаў. На гульню хакеісты ехалі з пачуццём гонару - прэзідэнт Расіі ўручыў ім ордэны Аляксандра Неўскага, а Аляксандр Якушаў атрымаў ордэн "За заслугі перад Айчынай" трэцяй ступені. Да віншаванняў далучыўся і беларускі лідар.

Хакей - строга камандная гульня. І ў ёй для Мінска і Масквы ёсць нейкі сімвалізм. Сапернікі гуляюць жорстка - так. Парушаюць правілы - так. Але з правільнай тактыкай і падборам гульцоў мы непераможныя.