Беларускія лыжныя акрабаты выступяць на Алімпійскіх гульнях у Пхёнчхане. І тут у нас рэальныя медальныя надзеі. Верым і жадаем поспеху! І прама зараз прапануем наведаць спартыўныя арэны будучых стартаў і нашых перамог. Колькі патрацілі на ўзвядзенне новых аб'ектаў у Паўднёвай Карэі? Як збіраюцца выкарыстоўваць збудаванні пасля Алімпіяды? І з якімі праблемамі могуць сутыкнуцца балельшчыкі? Эксклюзіўныя падрабязнасці ў праекце "Алімпійская віза" з Аляксандрам Ярмашам.
Алімпійскія аб'екты паўднёвакарэйскіх Гульняў (іх 12) разбіты на два кластары. Першы размешчаны ў самім Пхёнчхане. Там і будзе дадзены старт XXIII зімовай Алімпіядзе на арэне, пабудаванай толькі для ўрачыстых цырымоній. Стадыён адкрыты і даволі ўразлівы для вятроў. А тэмпературы ў гэты час года бываюць даволі нізкія.
На арэне няма сістэм ацяплення, а будаваць дах вельмі позна. Зрэшты, заяўляюць чыноўнікі, замерзнуць нікому не дадуць.
Лі Хі Бом, кіраўнік аргкамітэта зімовых Алімпійскіх гульняў - 2018 у г. Пхёнчхане:
"На цырымоніях адкрыцця і закрыцця Гульняў усім дадуць спецыяльныя плашчы і коўдры. Плануецца ўсталяванне сцен над самымі высокімі месцамі, каб блакіраваць вятры. Акрамя таго, каля 40 партатыўных газавых абагравальнікаў будуць знаходзіцца ў праходах паміж сектарамі трыбун, а ў продажы вы знойдзеце шмат гарачай кавы і чаю".
На іншых адкрытых арэнах саграваць будуць гарачыя спартыўныя спаборніцтвы. На свежым паветры вызначаць лепшых біятланісты, фрыстайлісты, лыжнікі, скакуны з трампліна, сноўбардысты і бабслеісты-саначнікі. Амаль усе аб'екты для гэтых відаў былі гатовы яшчэ да аб'яўлення Паўднёвай Карэі гаспадыняй Алімпіяды.
До Ёнг-Ван, міністр культуры, спорту і турызму Рэспублікі Карэя:
"На Гульні 2018 года прэтэндавалі таксама Францыя і Германія, але на карысць нашай заяўкі згулялі якраз аб'екты. Палова з іх была ўжо гатовая, і ўсе збудаванні даволі новыя. Мы іх узводзілі ў надзеі атрымаць зімовыя Гульні 2010 і 2014 гадоў. Ну і, вядома, кампактнасць. Дарога з месцаў пражывання ўдзельнікаў да арэн не зойме больш як паўгадзіны. Кластары знаходзяцца за 30 км адзін ад аднаго".
Другі кластар размясціўся на ўзбярэжжы горада Канын. Тут многія аб'екты пабудаваныя з нуля: дзве арэны для хакея, цэнтры для канькабежнага спорту і для фігурнага катання і шорт-трэка.
Кошт збудаваных новых аб'ектаў, якія прымуць спаборніцтвы зімовай Алімпіяды, вагаецца ад 36 да 122 млн долараў. Самае дарагое і тэхнічна складанае спартыўнае збудаванне - санна-бабслейны цэнтр. Першапачаткова карэйцы думалі аддаць турнір саначнікаў японцам, у якіх засталася інфраструктура пасля Гульняў-1998 у Нагана. Але ў выніку карэйскі гонар узяў сваё. Тут ужо праходзілі спаборніцтвы. Усё без нараканняў.
Таней за ўсё абышоўся канькабежны стадыён. Нягледзячы на гэта, арэна не самая маленькая па ўмяшчальнасці. Трыбуны ўмяшчаюць больш за 8 тысяч.
На 2 тысячы менш зможа прыняць арэна, якая пасля будзе перададзена ўніверсітэту. Бадай, для студэнцкага спорту большая ўмяшчальнасць наўрад ці патрэбная.
Як ужо было сказана, на галоўным алімпійскім стадыёне пройдуць толькі цырымоніі адкрыцця і закрыцця Гульняў. Малая эксплуатацыя арэны не перашкаджае ёй быць сярод самых дарагіх аб'ектаў Гульняў.
Самая ўмяшчальная спартыўная пляцоўка, як ні дзіўна, аддадзена не хакею, а фігурнаму катанню і шорт-трэку.
Усе ключавыя падзеі ў адзіным гульнявым відзе спорту ў праграме Алімпіяды пройдуць у 10-тысячным хакейным цэнтры Канына.
Алімпійскія вёскі ў Пхёнчхане і Каныне, а таксама медыяцэнтр таксама абсалютна новыя. Сумарна іх узвядзенне ацэнена ў 450 млн долараў.
Лі Хі Бом, кіраўнік аргкамітэта зімовых Алімпійскіх гульняў - 2018 у г. Пхёнчхане:
"Вядома, гэта не ўсе траты. Раней пабудаваныя аб'екты таксама даводзілася падводзіць пад сучасныя патрабаванні. Напрыклад, значна змяніўся біятлонны цэнтр. Наконт яго былі скаргі, адзін са спускаў аказаўся вельмі круты. Акрамя таго, мы хацелі зрабіць больш зручныя падыходы да стрэльбішча, а таксама ўсталявалі новыя магутныя пражэктарныя комплексы".
Перад Гульнямі ні адзін аб'ект не выклікае нараканняў. Але пытанне далейшай эксплуатацыі збудаванняў ніхто не адмяняў. Вобласць, у якой пройдзе Алімпіяда, адна з самых бедных і маланаселеных у Карэі. А пасляалімпійскае ўтрыманне арэн справа нятанная. І гэта не падабаецца многім мясцовым жыхарам.
Лёс некаторых аб'ектаў ужо вядомы. Напрыклад, алімпійскі стадыён на 35 тысяч месцаў у 40-тысячным Пхёнчхане альбо разбяруць, альбо пераробяць пад гандлёвы цэнтр. Гарналыжнаму комплексу нададуць першапачатковы выгляд. Ён быў пабудаваны ў запаведным лесе.
А пакуль Карэя чакае спартыўнае свята. Да зімовай Алімпіяды засталося 17 дзён.
